АН-ын жагсаалтад бичигдсэн залуус нэрээ татаж эхэлжээ. Одоогийн байдлаар дөрвөн хүн нэрээ татах хүсэлтийг АН-ын дарга Л.Гантөмөрт хүргүүлсэн байна. Тухайлбал, намын жагсаалтын 33-д бичигдсэн АН-ын улс төрийн зөвлөлийн гишүүн М.Чимэддорж нэрээ татах хүсэлтээ хүргүүлжээ. Тэрбээр УИХ-ын сонгуульд нэр дэвшигчдийг Улс төрийн зөвлөл болон ҮБХ-ны хуралдаанаар хэлэлцээгүй, санал хураагаагүй. Тиймээс хууль бусаар тодруулсан нэр дэвшигчдийн жагсаалтаас нэрээ хасаж өгөхийг хүссэн байна. 

Мөн жагсаалтын 38-д эрэмблэгдсэн ҮБХ-ын гишүүн Л.Отгонцэцэг нэрээ татжээ. Тэрбээр өөртэй нь зөвшилцөхгүйгээр жагсаалтад оруулснаас гадна 38-д бичигдэх ёсгүй байсныг дурдаж, нэрээ татсан байна. 

Тэднээс гадна АН-ын ҮБХ-ны гишүүн П.Нүрзэд нэрээ татжээ. Түүний нэр жагсаалтын 23 дугаарт бичигдсэн бөгөөд өөртэй нь зөвшилцөхгүйгээр бичсэнийг эсэргүүцэж, нэрээ татах хүсэлтээ Л.Гантөмөрт өгсөн байна. 

Мөн АН-ын дэд дарга Ц.Жадамбаа ч нэр дэвших өргөдлөө татжээ.  Түүний нэр УИХ-ын Сонгуулийн 8-р тойрог буюу Баянзүрх дүүрэгт дэвшихээр бичигдээд байсан ч өргөдлөө татлаа.

Ингэснээр АН-ын дөрвөн нэр дэвшигч Л.Гантөмөрийн багаас татгалзлаа. Тэд бүгд АН-ын нэр дэвшүүлэх ажиллагааг хууль бус болсныг мэдэгдэж, нэрээ цэвэр авч үлдэхийг хүсэв.

АН-ын нэр дэвшүүлэх ажиллагаа цэвэр явагдаагүй талаар АН-ын гишүүд дуугарч, эхнээсээ жагсаалтаас биш бүр намаасаа татгалзаж буй. Тухайлбал, АН-ын эмэгтэйчүүдийн сор гэгддэг З.Нарантуяа "Ямар ч нэр дэвшүүлэлт, ямар ч санал хураалт" болсонгүй хэмээн уурсаж, АН-аас гарч байгаагаа мэдэгдсэн. Мөн сэтгүүлч Г.Уянга ч АН-аас татгалзаж, нэр дэвшигчийн дэнчингийн 16 сая төгрөгөө нэхэмжлээд буй. 

УИХ-д суудалтай намууд буюу МАН, АН, ХҮН-ы дарга нар зөвшилцөж, лидерүүд жагсаалтад нуугдах бус тойрогт нэр дэвшиж, манлайлал үзүүлэхээ мэдэгдсэн ч Л.Гантөмөр, Т.Доржханд нар хэлснээсээ буцаж, намын жагсаалтынхаа тэргүүнд өөрсдийнхөө нэрийг биччихлээ. Энэ талаар ХҮН-ынхан дуугүй байж болох ч АН-ынхан амаа хамхиулахгүй. Залуус жагсаалтыг төдийгүй нэр дэвшүүлэх ажиллагааг бүхэлдээ хууль бус болсон талаар дуугарч эхэллээ. Ингэснээр АН-ын нэр дэвшигчдийг СЕХ хүлээн зөвшөөрөхгүй гэдэг асуудал үүсэж болзошгүй. Өөрөөр хэлбэл нам бүхэлдээ унахыг ч үгүйсгэх аргагүй нөхцөл байдалд байна.

Өнгөрсөн дөрвөн жилийн турш хэрэлдсээр ирсэн АН-ынхан сонгуулийн өмнө ч бүхэл болж чадсангүй. Энэ намынхан ирэх дөрвөн жил ч гудамжнаас орилж магадгүй нь.

Б.Хэрлэн