МАН-ын бүлэг Удирдах зөвлөлтэйгөө хамтарч хуралдаад Ерөнхийлөгч, АН-ын бүлгийн шаардлагыг хэлэлцсэн байна. Уг хуралдаанаарТэргүүн шадар сайдын орон тоог цомхотгохоор шийджээ. Энэ талаар Ерөнхий сайд, МАН-ын дарга С.Батболд мэдээлэл өглөө. Тэрээр, Улстөрийн нөхцөл байдал сүүлийн долоо хоног ээдрээтэй, Засгийн газрын үйл ажиллагаа явж чадахгүй, Засгийн хуралдаанаар гарах шийдвэрүүд хүлээгдэж байна. Үүний цаана улс орны ажил амьдрал, төлөвлөсөн төлөвлөгөөт болон хуулийн хүрээнд хийгдэх ажлууд, зорилт, цаг үеийн асуудлууд  их гарч байна. Хоёрдугаар сарын 1-нээс Засгийн газраар ярьж гурван тал хэлэлцээрээр тохиролцсон багш нарын цалинг нэмэх  асуудал ойрын хугацаанд шийдэгдэх ёстой. Үнэ ханштай холбоотой асуудалд Засгийн газрын зүгээс авах ёстой арга хэмжээ, хийх ёстой зохицуулалтын ажлууд шийдвэрээ хүлээж байна. Хэдийгээр бид олонхийн суудалтай ч гэлээ, Ерөнхий сайдын хуулиар олгогдсон бүрэн эрхийн хүрээнд өмнөө тавсан зорилт өөрчлөгдөөгүй, хийж дуусгах ёстой. Хуулийн хүрээнд зөвшилцлийг явуулж Засгийн газрын зургаан гишүүнийг томилуулж бүрэн бүрэлдэхүүнээр нь ажиллуулах асуудал тавьсан ч улстөрийн зөвшилцлийн хүрээнд гацаа үүссэн. Энэ гацааг урт хугацаагаар байлгавал Засгийн газар, улс орны ажил амьдрал бэрхшээл хүндрэлүүд гарна. Биднийг улс төрөөр толхилцож суухын оронд улс оронд шийдэх ёстой ажлууд цаг алдаж байна гэдгийг МАН-ын дарга, Ерөнхий сайдын хувьд ярилцсан. Ингээд зохих журмын дагуу ярилцаад Засгийн газрын бүрэлдэхүүнд өөрчлөлт оруулж Тэргүүн шадар сайдын орон тоог цомхотгож улстөрийн гацааг шуурхай гаргаж Засгийн газрын үйл ажиллагааг хэвийн явуулах нөхцлийг бүрдүүлэхээр МАН-ын бүлэг, Удирдах зөвлөлд асуудлыг танилцуулсан. Энэ саналыг дэмжлээ. Энэ албан тушаалд Ерөнхий нарийн бичгийн дарга У.Хүрэлсүх даргыг санал болгосон ч төрийн ажил цаг алдахгүй явах нь чухал гэдгийг намын  гишүүд дэжсэн нь бид ард түмэн, улс орныхоо өмнө хариуцлагатай байх ёстой гэсэн үүргээ ухамсарлаж байна.  Энэ саналаа Ерөнхийлөгчид хүргүүлж зөвшилцлийг эхлүүлж байна.