УИХ-ын ээлжит чуулганы нэгдсэн хуралдааны өнөөдрийн /2025.04.10/ ирцийн мэдээг хүргэж байна. 126 гишүүнээс тав нь эмнэлгийн чөлөөтэй, найм нь орон нутгийн томилолттой, долоо нь гадаад томилолттой, зургаа нь чөлөөтэй байна. Харин Х.Баттулга, Ж.Бат-Эрдэнэ,Л.Гантөмөр, Т.Доржханд, Н.Учрал, Ж.Энхбаяр нарын зургаан гишүүн тасалжээ. Өчигдөрхөн /2025.04.09/ Ёс зүй дэгийн байнгын хорооны хуралдаанаар УИХ-ын гишүүн Х.Баттулга чуулганы нэгдсэн хуралдааныг 60 гаруй цаг тасалсан гэх үндэслэлээр 6 сарын цалингаа 20 хувиар бууруулах сахилгын шийтгэл авсан. Мөн хэвлэлд өгсөн ярилцлагадаа "Одоо хуралдаа сууна аа. Нэгдүгээрт, бүртгүүлэх гэхээр төхөөрөмж нь болохгүй байгаа. Хоёрдугаарт, эрүүл мэндийн асуудалтай байна. Гэхдээ одоо сууж байгаа. Ээж байнга загнаад байна" гэж хэлсэн ч өнөөдөр дахиад л чуулганы хуралдаандаа суусангүй.

Ёс зүй, дэгийн байнгын хорооны дарга Б.Баярбаатар "Х.Баттулгын хэвлэл мэдээлэлд өгсөн ярилцлагыг үзлээ. "Би ирдэг, харин төхөөрөмж болдоггүй" гэж ярьжээ. Юм л бол хойд хар овоохой гэдэг шиг санал хураалтын төхөөрөмж рүү буруугаа чихдэг асуудлаа одоо болих хэрэгтэй. Том агуулгаараа яривал Монгол Улсын парламентыг үл хүндэтгэсэн байдал шүү. Өөдөөс нь 70-80 УИХ-ын гишүүн хараад сууж байна. Бүгд эсвэл сохор болчихсон хэрэг үү. Тэр хүн чинь харагддаггүй шүү дээ. Эсвэл үл үзэгдэгч малгай өмсөж орж ирдэг юм уу. Иймэрхүү байдлаар танхимд байгаа УИХ-ын гишүүд, сонгосон иргэдээ, МУ-ын парламентыг доромжилсон зүйл ярьж болохгүй. УИХ-ын гишүүн бол хариуцлагатай албан тушаал" гэдгийг онцолж байв.