Монгол орны уур амьсгал жилээс жилд өөрчлөгдөж, ган гачиг, үер усны эрсдэл нэмэгдэж байгаа энэ цаг үед усны нөөцийг хамгаалах асуудал хамгийн чухал сэдэв болоод байна. Тиймээс Монгол Улсын Ерөнхийлөгч Ухнаагийн Хүрэлсүхийн санаачилгаар “Цэнхэр алт” үндэсний хэмжээний хөтөлбөрийг эхлүүлэх нь зүйтэй гэж үзжээ.

Усаа хайрлаж, хамгаалах “Цэнхэр алт” хөтөлбөр хэрэгжүүлэх цаг болсон.

Алтайн бүсийн мөсөн гол, мөнх цасны талбай 1940 оноос хойш 40 хувиар багассан байна.  Тиймээс нууруудын судалгаа хийх, хайлсан ус хуримтлуулах, мөн мөстлийн хайлалтыг удаашруулах технологийг нутагшуулах шаардлагатайг тодотгов. Мөн бохир усыг цэвэршүүлж, дахин ашиглах системийг нэвтрүүлэх нь “Цэнхэр алт”-ын зорилгын нэг гэж мэдэгдсэн юм.

Усны салбарт шинэ эрин эхлүүлэх энэхүү хөтөлбөр “Тэрбум мод”, “Хүнсний хувьсгал”, “Эрүүл монгол хүн”, “Цагаан алт” зэрэг үндэсний хөдөлгөөнүүдийн үргэлжлэл бөгөөд байгаль орчныг хамгаалахад нийт иргэд, хувийн хэвшил, төрийн байгууллагууд хамтран оролцох цогц хандлагыг илэрхийлж буй хэрэг болж байна.

Мөн уул уурхайн томоохон аж ахуйн нэгжүүдэд хандан “амласан модоо тарьж, ургуулах нь үүрэг төдийгүй хариуцлага” гэдгийг Ерөнхийлөгч санууллаа. Үүний сацуу “Нэг нуур, Нэг сум – 333 нуур”, “Дусал бүр” зэрэг усны нөөцийг нэмэгдүүлэх, хадгалах, хэмнэх зорилтот уриалгуудыг улс даяар хэрэгжүүлэхийг чуулганаар хэлэлцэн зөвлөмж гаргахаар болжээ.