Дональд Трампын шийдвэрээр Холбооны засаг захиргаа Харвардын их сургуулийн санхүүжилтийг царцаах шийдвэр гаргасан. Нийтдээ 2.2 тэрбум долларын санхүүжилт болох, оюутны тэтгэлэг тэргүүтэй үйл ажиллагааны зардлыг хассанаар тус сургуулийн захиргаанаас Дональд Трампын шийдвэрийг эсэргүүцсэн мэдэгдэл гаргаж оюутнууд эсэргүүцлийн цуглаан зохион байгуулсан байдаг.

“The Wall Street Journal”-ын мэдээлснээр, Холбооны засгийн газар дахин 1 тэрбум  долларын санхүүжилтийг хасахаар болжээ.

Харвард тэргүүтэй их сургуулиудын санхүүжилтийг царцааж байгаа шалтгаан нь АНУ-ын оюутны хотхонуудад антисемизм газар авч еврейчүүдийг ялгаварлан гадуурхах асуудал хэрээс хэтэрсэн гэж Дональд Трамп үзсэн. Мөн АНУ-д өрнөх болсон соёлын дайныг тус улсын их сургуулиуд өдөөж буйг онцолсон байдаг. Тиймээс соёлын дайныг өдөөдөг их сургуулиудын хэт зүүний үзлийг зогсоох гол арга зам нь санхүүжилтийг нь царцаах гэж Дональд Трамп мэдэгдсэн байдаг.

Тэгвэл өнгөрсөн сард Холбооны засаг захиргаа Колумбын их сургуулийн 400 сая долларын санхүүжилтийг царцаасан байдаг. Тус сургууль Дональд Трампын шаардлагуудыг сахин биелүүлэхээр сахилгын шинэ журам гаргаж, Ойрхи Дорнодын сургалтын хөтөлбөрөө нэн даруй хянаж үзэх хэд хэдэн бодлогын өөрчлөлт хийжээ.