Энэтхэгийн Кашмир мужид аялж явсан дотоодын жуулчид руу зэвсэгт этгээд гал нээж 20 хүн амиа алджээ.  Зэвсэгт халдлага "Энэтхэгийн Швейцарь" гэгддэг Гималайн нурууны үзэсгэлэнт Пахалгам хотод болсон байна. Тус бүс нутагт жуулчид ихээр ирдэг бөгөөд ийм төрлийн зэвсэгт халдлага ойрын үед нэмэгдэж байгааг мужийн захирагч мэдэгджээ.

Кашмираас гарах болсон зэвсэгт халдлага, сэтгэл түгшээсэн мэдээ нэмэгдэж буйг АНУ-ын Ерөнхийлөгч Дональд Трамп, ОХУ-ын Ерөнхийлөгч Владимир Путин, ЕХ-ны тэргүүн Урсула фон дер Ляйен нар онцолж, терроризмтэй тэмцэх ажиллагааг эрчимжүүлэхийг уриалжээ.

Уг халдлагын дараа Энэтхэгийн Ерөнхий сайд Нарендра Моди Саудын Арабт хийх айлчлалаа хойшлуулаад байна. Мөн тус улсын аюулгүй байдлын алба нэн даруй хуралдаж терроризмтой тэмцэх ажиллагааг нэмэгдүүлэх арга хэмжээг авна гэв. Зэвсэгт халдлага болох үеийн видео бичлэгт зэвсэгт этгээдүүд мусальман биш хүмүүсийг онилсон байгаа нь харагдсан бөгөөд шархдсан иргэд тусламж гуйж, амь өршөөхийг гуйж байгаа нь бичигджээ. Одоогоор Кашмирт халдлага үйлдсэн этгээдүүдийн эрэн хайх ажиллагаа үргэлжилж байгаа бөгөөд тус мужаас орох гарах бүх гарцыг цагдаа нар хааж бүсэлсэн байна. Эрэн хайх ажиллагааг тус улсын арми болоод Жамму Кашмирын цагдаагийн газар хамтран үргэлжлүүлж байна.