Агуу их эх орны дайны ялалтын түүхт 80 жилийн ойд Монгол Улсын Ерөнхийлөгч У.Хүрэлсүх уригдан очоод буй. Ялалтын баярт уригдсан Ерөнхийлөгч У.Хүрэлсүхийн сүржин хийцтэй, сүртэй рийлс нийгмийн сүлжээг доргиож, монголчуудыг огшоов. Аргагүй л бахархах түүхийг хамтдаа бүтээлцсэн ард түмэн билээ л гэж Монгол хүн бүр омогшихоор, муухан киног хол орхих бичлэгүүд аж. 

Гэтэл удсангүй, ялалтын баярт уригдсан төрийн тэргүүнүүдийн зураг цахим орчинд тарж байна. 

Зураг дээр урд эгнээнд (зүүнээс баруун тийш) Казахстаны Ерөнхийлөгч Касым-Жомарт Токаев, БНХАУ-ын дарга Ши Жиньпин, ОХУ-ын Ерөнхийлөгч Владимир Путин, Беларусийн Ерөнхийлөгч Александр Лукашенко, Арменийн Ерөнхий сайд Никол Пашинян нар тухалжээ. 

Ард нь нилээн хойгуур манай У.Хүрэлсүх "шоовдор" маягтай тэднийг харан суух нь өнчин хүү хаяа хатавч бараадан хоймор ширтэн санаа алдах мэт гунигтай. 

Их гүрний удирдагчид уу гэтэл ОХУ, БНХАУ эс тооцвол статусын хувьд манайхтай ижил түвшний, сайн яривал манайхаас "хэцүү" Беларусийн дарангуйлагч Александр Лукашенко урд эгнээнд сууж байх юм.  

Байлдаантай боевик маягийн кино шиг богино рийлсээр цахим орчинд өөрийгөө  сурталдах манай Ерөнхийлөгчийн Пи-Ар хэдийн цөмөрснийг энэ зураг харуулжээ.   

Монгол улсын эрэмбэ дараа, статус Беларус, Армен, Казахтсанаас тээр хойно байгаа нь бодит байдал. Цахим орчин бодит амьдрал хоёрын зөрүү асар хол байдгийн жишээ энэ. Ерөнхийлөгчийн Пи-Ар багийн богино бичлэгүүдээс харвал Монгол улсын гадаад харилцаа, геополитикийн тавцанд эзлэх байр суурь өндөр харагдах. Гэвч энэ зураг У.Хүрэлсүхийн хэтэрсэн рекламыг байранд нь тавьжээ.

Ерөнхийлөгч У.Хүрэлсүх тойрон хүрээлэлдээ хэрхэн вакуумжиж, тойрон хүрээлэгчид нь Монголчуудын тархийг "тасарчихсан" бодит байдлаас зөрүүтэй видеогоор угааж байгаа нь энэ. Бодит байдал богино рийлсээс асар зөрүүтэйг иргэд ойлгодог болсон. 

 Ийм төрлийн арга хэмжээн дээр оролцогчдын суудлын эрэмбийг ихэвчлэн улс орнуудын эрх мэдэл, нөлөө, төрийн тэргүүний зэрэглэл буюу ерөнхийлөгч, ерөнхий сайд, хаан гэх мэтээр эсвэл дипломат ёслолын дэг журам буюу тухайн арга хэмжээний зохион байгуулагчийн дотоод журам, урьдчилан тохирсон гэрээ хэлцлээр тогтоодог.  

Энэ арга хэмжээнд их гүрнүүдийн удирдагчид (ОХУ, БНХАУ) төв хэсэгт, бусад орны удирдагчид тэдний ойролцоо суусан нь тэдний геополитикийн байр суурийг харуулж байна. 

Улс орных нь статус бага буурай, ард түмнийх нь амьдрал ахуй өдрөөс өдөрт доройтож байхад их гүрний удирдагч нар шиг (Д.Трамп) амьдралаас тасархай богино бичлэгүүд байнга хийдэг нь хэний мэргэн санаа вэ? Тойрон хүрээлэгчдийнх нь мэдлэггүйнх үү, мэдрэмжгүйнх үү?... Эрэмбэ болоод рийлсийнх нь зөрүү бас л...

А.Лукашенко, Н.Мадуро нарын суртал ухуулга л амьдралаас хэт зөрүүтэй, хэтэрдэг сэн. 

Ер нь татвар төлөгчдийн мөнгөөр Пи-Ар багаа угжиж, тэднийхээ "манкурт" болж үзэмж, хөөхөө хэзээ болих вэ, Ерөнхийлөгч өө?...Хэмнэ л дээ...! Хийсэн ажил чинь л нэрийн хуудас тань болох бус уу?