ОХУ-ын хилээр хууль бус бэлэн мөнгө нэвтрүүлэхийг завдсан монгол иргэнийг саатуулан шалгаж эхэлсэн талаар тус улсын хэвлэл мэдээллийн хэрэгслүүд мэдээллээ.

Оросын Красноярскийн гаалийн газрын мэдээлснээр, 54 настай монгол эрэгтэй Хандгайтын шалган нэвтрүүлэх боомтоор хил давах үеэр мэдэгдэхүйц сандарсан байдалтай байсан бөгөөд аман байцаалтаар “эд зүйлгүй, мөнгөгүй” хэмээн мэдүүлсэн байна. Гэвч гаалийн байцаагчид хувийн үзлэг хийхэд түүний хувцасны ар хэсгээс бэлэн мөнгөтэй хар цүнх илэрчээ.

Уг цүнхэнд байсан мөнгийг шалгаж үзэхэд нийт 6.2 сая рублийг ОХУ-ын хилээр хууль бусаар нэвтрүүлэхийг завдсан нь тогтоогдсон байна. Энэ зөрчлийг ОХУ-ын Бүгд Найрамдах Тува улсын Холбооны аюулгүй байдлын алба болон гаалийн албаныхан хамтран илрүүлжээ.

Ийм төрлийн зөрчилд эрүүгийн хэрэг үүсгэн шалгах бөгөөд хуулийн дагуу холбогдох этгээдэд бэлэн мөнгөний хэмжээг 10-15 дахин нэмэгдүүлсэнтэй тэнцэх хэмжээний торгууль, эсвэл дөрвөн жил хүртэлх хугацаагаар хорих ял оноох боломжтой юм. Одоогоор шүүхийн шийдвэр гарах хүртэл бэлэн мөнгийг хураан авч, шалгалтын ажиллагааг үргэлжлүүлж байгаа аж.

Сүүлийн жилүүдэд ОХУ-ын хилээр гарч буй монгол иргэд ижил төстэй зөрчил гаргах нь нэмэгдэж байгааг албаныхан анхааруулж байгаа юм. Тухайлбал, өмнө нь нэг иргэн хоёр элбэнхийг хилээр гаргах гэж оролдсон, мөн мах, сүүн бүтээгдэхүүн, малын гаралтай түүхий эдийг ОХУ-д нууцаар нэвтрүүлэхийг завдсан тохиолдлууд бүртгэгдэж байжээ. Эдгээр бараа бүтээгдэхүүн нь тус улсад хориотой бөгөөд эпизоотик өвчний голомттой бүс нутгаас импортлогдсон гэж үздэг байна.

Иймд гадагш зорчиж буй иргэд хууль, журам зөрчихөөс зайлсхийж, хилээр гаргах эд зүйлээ нягталж байхыг холбогдох байгууллагууд анхааруулж байна.