Дэлхийн хамгийн том хоёр эдийн засаг “тарифын дайнд” түр эвлэрээд буй. Гэвч БНХАУ АНУ-д цохилт өгөх стратегийн давуу тал болох газрын ховор элементэд тавих хяналтаа сулруулсангүй.  АНУ болон БНХАУ-ын төлөөлөгчид өнгөрсөн долоо хоногт Женевт хэлэлцээр хийж тохиролцоонд хүрсэн. Уг хэлэлцээрийн хүрээнд БНХАУ-ын талаас “тарифын бус” хоригуудаа зогсоохоо амлалт өгсөн байдаг. БНХАУ-ын тарифын бус хориг тавигдсан ч газрын ховор элементийн экспортын хориг хэвээр үлджээ. Тус улс өнгөрсөн 4-р сарын 4-ний өдөр АНУ-ын тарифын бодлогын хариу арга хэмжээ болгож газрын ховор элементийн экспортын зөвшөөрлийн шинэ журам гаргасан байдаг. Энэ журмын дагуу экспорт бүрт тусгай зөвшөөрөл шаардах болсон юм. БНХАУ-ын хариу арга хэмжээ болсон газрын ховор элементийн экспортын шинэ журам нь АНУ-ын цэрэг батлан хамгаалах салбар, өндөр технологи, онгоц, чип зэрэг салбаруудад түгшүүр үүсгээд байна.  

АНУ-ын зүгээс, БНХАУ-ын төлөөлөгчид хэлэлцээрийн үеэр экспортын хязгаарлалтаа цуцална гэж мэдэгдсэн. Гэвч үнэн хэрэгтээ хяналтаа улам чангатгаж, бүртгэлгүй хилээр гарах ховор элементийн урсгалыг ч барьж байна. Сүүлийн өдрүүдэд БНХАУ-ын үйлдвэрлэгчид соронзны экспортын зөвшөөрөл авч эхэлсэн нь шинэ журам хэрэгжиж буй жишээ мөн.  Тухайлбал, “Volkswagen” компанид ховор элементийн экспортын зөвшөөрөл нь гарсан нь Хятадын геополитикийн мессеж гэж шинжээчид үзэж байна.

БНХАУ газрын ховор элементийн олборлолт, боловсруулах зах зээлийн гол тоглогч хэвээр байгаа бөгөөд энэ давуу талаа АНУ-ын шахах зэвсэг болгон ашигласаар байна.