Шведэд төвтэй автомашин үйлдвэрлэгч "Volvo Cars" зардлаа бууруулах төлөвлөгөөний хүрээнд 3,000 орчим ажилтнаа цомхотгох мэдэгдлээ. Тус компанийн мэдээлснээр цомхотгол Швед дэх оффисын ажилтнуудад хамаарна гэжээ. Өнгөрсөн сард Volvo Cars (Хятадын Geely Holding компанийн эзэмшилд байдаг) 1.9 тэрбум ам.доллар бүхий шинэчлэлийн “үйл ажиллагааны төлөвлөгөө” хэрэгжүүлэхээ зарласан байдаг.  "Volvo Cars"-ийн Гүйцэтгэх захирал Хокан Самуэльссон, “Автомашины салбарын хувьд хүндхэн цаг үе ирээд буй тул бид энэхүү шийдвэрийг гаргалаа. Хичнээн хэцүү байсан ч эцэстээ  Volvo Cars-ийн төлөө шийдвэр юм гэжээ.

"Volvo Cars" компанийн энэ оны эхний 4 сарын борлуулалт өмнөх оны мөн үетэй харьцуулахад 11 хувиар буурсан байна.  "Volvo Cars"-ийн төв байр болон хөгжүүлэлтийн оффис Шведийн Гётеборг хотод байрладаг бөгөөд тус компани Швед, Бельги, Хятад болон АНУ-д томоохон үйлдвэрлэлийн үйлдвэрүүдтэй. "Volvo Cars" анх АНУ-ын автомашин үйлдвэрлэгч Ford-ын эзэмшилд байсан ч 2010 онд Хятадын Geely компанид зарагдсан билээ. Тус компани 2021 онд бүх автомашинаа 2030 он гэхэд бүрэн цахилгаан хөдөлгүүртэй болгоно гэж мэдэгдэж байсан ч Д.Трампын тариц болон зах зээлийн тодорхойгүй байдалтай холбоотойгоор зорилтоо хойшлуулж байна.

2025 он дэлхийн автомашины зах зээлд томоохон сорилт учирсан хүнд жил болох төлөвтэй байна. Тухайлбал, Японы автомашин үйлдвэрлэгч "Nissan" энэ сарын эхээр дэлхий даяар дахин 11,000 ажлын байр цомхотгож, 7 үйлдвэрээ хаахаа мэдэгдсэн. "Nissan" компанийн борлуулалт Хятад, АНУ-д эрс буурсан бол Honda болон Mitsubishi-тэй хамтархаар төлөвлөж байсан нэгдэл нь ч нурж унасан юм.