Газын зурваст 60 хоногийн хугацаанд гал зогсоохыг Хамас болон Израилын талууд зөвшөөрчээ. Мөн 60 хоногоор гал зогсоох уг саналыг АНУ-д хүргүүлээд байна. АНУ-ын Ерөнхийлөгч Дональд Трамп Газын зурваст гал зогсоох асуудлаар мэдэгдэл хийх төлөвтэй байна. Уг саналд  барьцаанд байгаа 10 хүнийг суллана. Гэхдээ суллах үйл явцыг 2 үе шаттай зохион байгуулах аж. Мөн ХАМАС бүлэглэл эхний долоо хоногт 20 орчим хүний цогцсыг Израилын талд хүлээлгэн өгнө гэж заажээ. 

Израилын зүгээс өмнө батлагдсан жагсаалтын дагуу Палестины хоригдлуудыг суллана. Үүнээс гадна өлсгөлөнд нэрвэгдээд буй Газын зурваст хүмүүнлэгийн тусламж хүргэх ажиллагааг хэвийн явуулах тухай заасан байна. Учир нь Газын зурвас тэр чигтээ өлсгөлөнд нэрвэгдэж, иргэд хүнсний төв агуулах руу дайрч эхлээд байна. Лхагва гарагт Газын төв хэсэгт байрлах хүнсний агуулах руу Палестин иргэд дайран орсон. Дэлхийн хүнс хөтөлбөрийн мэдээлж байгаагаар агуулах руу дайрсан Газын оршин суугчид руу Израилын талаас гал нээж 2 хүн амиа алдаж, 47 хүн шархджээ. Израилын бүслэлтийн улмаас Газын зурваст бүтэн 3 сарын хугацаанд хүнс ачсан хүмүүнлэгийн машинууд нэвтэрч чадаагүй. Тиймээс Газын зурвас дахь өлсгөлөн даамжирч, хяналтаас бүрэн гарчээ. Яг одоо Газын оршин суугчдад хүргэх хүнсний хангамжийг нэмэгдүүлэхгүй бол нөхцөл байдал хүнд байна хэмээн дэлхийн хүнс хөтөлбөрөөс анхаарууллаа. Өнгөрсөн долоо хоногт Израилын талаас бүслэлтийг сулруулж хүнс ачсан тусламжийн машиныг нэвтрүүлж эхэлсэн.