Энхийн гэрээ байгуулах асуудлаар Орос, Украины төлөөлөгчид Даваа гарагт Истанбул хотноо уулзсан. Талуудын хоёр дахь шатны уулзалтад АНУ ихээхэн найдлага тавьж байсан ч амжилтгүй өндөрлөсөн юм. Хэлэлцээрт орох талуудын уулзалт хугацаанаасаа оройтож эхэлсэн бөгөөд нэг цаг гаруй хугацаанд үргэлжилжээ. Талууд энэ удаад шинэ хоригдол солилцох асуудлыг хэлэлцсэн ч нэгдсэн тохиролцоонд хүрч чадаагүй юм.

Учир нь Орос Украины хоёрдахь шатны уулзалтын өмнөх өдөр буюу ням гарагт Украины талаас Оросын цэргийн 4 баазыг онилсон цохилтыг өгсөн. Уг цохилт нь ОХУ-ыг гэнэдүүлэн хийгдсэн бөгөөд тус улсын стратегийн далавчит пуужин тээгч онгоцны нийт 34 хувийг буюу 41 онгоцыг сөнөөсөн байна.

Оросын төрийн мэдээллийн агентлагууд Орос улс энхийн санамж бичигтээ гал зогсоох хоёр "сонголт" тавьсан гэж мэдээлэв.

Эхний хувилбарт Кремль Украины Донецк, Луганск, Херсон, Запорожье мужуудаас Украины Зэвсэгт хүчнийг бүрэн гаргах тухай тусгасан. ОХУ-ын зүгээс 2022 оноос эхлэн тус бүс нутгуудыг өөртөө нэгтгэх оролдлого хийж зарим газарт хяналтаа тогтоосон ч бүрэн эзэлж чадаагүй билээ.

Харин “Багцын гэрээ” гэж нэрлэгдсэн хоёр дахь хувилбарт Украины армид үзүүлж буй барууны цэргийн тусламжуудыг, тэр дундаа тагнуулын мэдээлэл хуваалцах алхамыг бүрэн зогсоох тухай тусгажээ. Мөн Украин улс цэрэг дайчилгааг хориглох, байлдааны бэлэн байдлаа цуцлах, байлдааны бэлэн байдлыг цуцалснаас хойш 100 хоногийн дотор сонгууль явуулах ёстой гэж энхийн гэрээний санамж бичигт тусгажээ.

Украин талаас энэ хоёр хувилбарын нэгийг сонгох ёстой. Гэвч алийг нь хүлээн зөвшөөрөх эсэх тодорхойгүй байна. Эсвэл Украины талаас Оросын гүнд цохилт өгсөн нь тус улсын санамж бичигт тусгасан саналыг үл зөвшөөрч буйгаа ням гарагийн цохилтоор мэдэгдсэн үйлдэл боллоо гэж зарим шинжээчид үзэж байна.  Энэ тохиолдолд талуудын энхнийн хэлэлцээ нэгмөсөн дуусгавар болж Д.Трампын найдлага тасрах юм.