Энэ хаврын улс төр нэгэн сонирхолтой нүүдлээр үргэлжилж буй. Эдийн засаг, хөгжлийн сайдын үүрэг гүйцэтгэгч Л.Гантөмөр Засгийн газрын бүрэлдэхүүнээс гарч, Ерөнхий сайд асан Л.Оюун-Эрдэнийн тэргүүлсэн кабинетад итгэл үзүүлэхгүй гэдгээ ил тод илэрхийлснээр, улс төрийн хүрээнд гүнзгий хардлага, таамаг дэвшүүлэхэд хүргээд байна. Л.Гантөмөр Л.Оюун-Эрдэнийн кабенитаас гарсан нь зарчмын байр суурь байсан уу аль эсвэл улстөрийн том зорилгын стратегийн эхлэл байв уу?

С.Эрдэнийн хоёрдугаар анги...

АН-ын дарга С.Эрдэнэ 2021 онд Х.Баттулгыг тонгорч, Ерөнхийлөгчийн сонгуульд нэр дэвшсэн нь У.Хүрэлсүхэд өвдөг шороодох тохироо байсан. Үр дүнд нь өнөөгийн Ерөнхийлөгч У.Хүрэлсүх өрсөлдөгчгүйгээр сонгуульд ялалт байгуулсан байдаг. Л.Гантөмөр ч улстөрийн ийм нүүдэл хийхээр зэхэж буй байж магадгүй байна. Яагаад байж болохгүй гэж?

Ерөнхийлөгч У.Хүрэлсүх зургаан жилээр зөвхөн нэг удаа сонгогдох үндсэн хуулийн заалтаар дахин оролдохгүй гэдгээ мэдэгдсэн. Гэхдээ тэр яаж ч мэдэх гэмтэй.

Л.Оюун-Эрдэнийн тэргүүлсэн Засгийн газраас хөөгдөх шахуу юм болж гарсан түүний хувьд 2027 оны Ерөнхийлөгчийн сонгууль руу чиглэсэн шатрын нүүдэл хийсэн байж мэднэ. Тиймдээ ч улстөрийн албан тушаал хашихгүй байх шаардлагын дагуу тэрээр ‘’замаа цэвэрлэж’’ эхэлсэн байж болох л юм.

Л.Гантөмөр 2024 оны УИХ-ын сонгуульд намдаа хангалттай үр дүн авчраагүй ч намынхаа институцийн хяналтыг барьж үлдсэн. Л.Оюун-Эрдэнийн Засгийн газраас хөөгдсөн шахуу ч бас хөөгдөхгүй байх, Л.Оюун-Эрдэнийг дэмжиж ажиллах сонголт түүнд байсан ч татгалзсан цаад шаллтгаан нь тоглоомын дүрмийг өөрчлөх стратеги руу шилжлсэн ч байж болно.

2016 онд АН УИХ-д унасан. 2020 онд дахин шороотой хутгалдсан. 2024 онд “амьсгаа” авч, 2025 оноос эхлэн Гантөмөрийн удирдлага дор системийн сөрөг хүчний дүрд дахин орж эхэлж байна. Энэ бол 2005 оны Ц.Элбэгдоржийн Ерөнхийлөгчийн сонгуулийн өмнөх үйл явдлыг зарим талаар санагдуулж буй.

Л.Гантөмөр бол өнөөдрийн улс төрд алсыг харсан тоглогч цөөн байгаа нөхцөлд өөрийн “зорилтот байрлал”-ыг засаж яваа улстөрч. Түүний кабинетынхаа эсрэг хийсэн алхам бол 2027 оны Ерөнхийлөгчийн сонгуулийн зургийг урьдчилан будах оролдлого ч байж мэднэ. Тэр хожиж магадгүй. Бас бүхнээ алдаж ч магадгүй. Гэхдээ шатар тоглож эхэлсэн нь тодорхой.