Израил Ираны мөргөлдөөн 5 дахь өдөртөө үргэлжилж байна. Ираны эрүүл мэндийн яамны мэдээлснээр баасан гарагаас хойш Израилын пуужингийн довтолгоонд өртөж амь насаа алдсан хүмүүсийн тоо 225-д хүрсэн гэв. АНУ-ын хувьд Израил Ираны дайнд оролцохгүй гэж албан ёсоор мэдэгдээд байна. АНУ-ын Ерөнхийлөгч Дональд Трампын хувьд Ойрхи Дорнодын нөхцөл байдал ширүүсэж байгаа учраас Канадад болж буй “Их долоогийн уулзалтаа богиносгож байна” гэж CNN мэдээлжээ. Тэрээр Ираны нийслэл Тегеранаас 10 орчим сая оршин суугчдын нүүлгэн шилжүүлэхийг зөвлөөд байна. Тегераны оршин суугчдыг нүүлгэхийг зөвлөсөн нь Израилын довтолгоо ширүүсэх магадлалтай гэж шинжээчид үзэж байна.  Израилын армийн зүгээс Тегеран хотын "цэргийн дэд бүтэц"-ийг онилох төлөвлөгөөтөй байна.

Иран болон Израилын талууд өнгөрсөн баасан гарагаас эхлэн харилцан пуужин харваж агаарын довтолгоо хийж байна. Израилын арми Ираны цөмийн байгууламжуудыг устгаж байна хэмээн мэдээлсэн юм. Даваа гарагт Израилын зүгээс Тегеран дахь Исламын хувьсгалт гвардын корпусын хэд хэдэн командлалын төвд дараалсан цохилууд өгчээ. Мөн Ираны “газар-газар” ангиллын пуужин хадгалдаг байж болзошгүй хэд хэдэн объектод цохилт өгсөн тухай Израилын тал ням гаргийн орой мэдээлжээ.

Тэгвэл Ираны талаас Израилын Тел-Авив, Иерусалим хотын иргэний дэд бүтцүүдэд цохилт өгч буй бөгөөд орон сууцны барилга байгууламжууд ихээр сүйдэж байна.