Монгол Улсын Их хурлын гишүүн, Засгийн газрын гишүүн, Батлан хамгаалахын сайд Д.Батлут, БХЯ-ны Төрийн нарийн бичгийн дарга бригадын генерал Д.Ганхуяг тэргүүтэй БХЯ-ны удирдлага ЗХЖШ-т ажиллалаа.

Батлан хамгаалахын сайдыг “Монгол Улсын цэргийн нийтлэг дүрэм”-ийн дагуу Хүндэт харуул жагсаж, ЗХЖШ-ын дарга, удирдлага, бүтцийн нэгжийн дарга нар угтаж авлаа.

ЗХЖШ-ын дарга хошууч генерал С.Ганбямба Зэвсэгт хүчний үйл ажиллагааны талаар болон ЗХЖШ-аас авч хэрэгжүүлж байгаа үйл ажиллагаа, цаашид хэрэгжүүлэх ажил, арга хэмжээ, тулгамдаж буй асуудлыг дэлгэрэнгүй танилцууллаа. 

Батлан хамгаалахын сайд Д.Батлут хэлсэн үгэндээ салбарын өмнө тулгамдаж буй асуудлуудыг Зэвсэгт хүчнийхээ удирдлагатай нягт хамтран ажиллаж шийдвэрлэнэ, “Би биш Бид” гэсэн зарчмыг үйл ажиллагаандаа мөрдлөгө болгож хууль, эрхзүйн орчныг сайжруулах, мэргэжлийн цэрэгт суурилсан Зэвсэгт хүчнийг бэхжүүлэх, гадаад харилцааг өргөтгөх, энхийг дэмжих ажиллагааны оролцоог нэмэгдүүлэх, батлан хамгаалахын аж үйлдвэрлэлийг хөгжүүлэх, цэрэг эх оронч үзлийг төлөвшүүлэх, алба хаагчдын нийгмийн хамгааллыг сайжруулах чиглэлүүдээр үндсэн бодлого, үйл ажиллагаагаа хэрэгжүүлнэ хэмээн онцоллоо.