УИХ-ын Төсвийн байнгын хорооны хуралдаанаар Тээврийн хэрэгслийн татварын нэмэгдлийг цуцлахтай холбоотой өргөдлийг судлан үзэж, санал дүгнэлт гаргах үүрэг бүхий ажлын хэсгийн санал дүгнэлт болон Засгийн газарт чиглэл өгөх тухай тогтоолын төслийг хэлэлцлээ.

Дээрх хуралдаанаар автомашины татварын нэмэгдлийг цуцлах асуудлыг хэлэлцэх явцад "автомашины татвар нэмэх шийдвэрийг ердөө хоёрхон хүний саналаар гаргасан" гэдгийг УИХ-ын гишүүн Ж.Баясгалан хэлэв.

Энэ бол зөвхөн татвар нэмэгдүүлсэн шийдвэр бус, шийдвэр гаргах процесс нь өөрөө ардчилсан зарчмыг зөрчиж, цөөнхийн үзэмжээр олонхийн амьдралыг шийдэж буй ноцтой жишээ юм. Хэдий ардчилсан тогтолцоотой улс гэгдэх ч, шийдвэрүүд нь олон нийтийн оролцоо, хэлэлцүүлэггүй, хүч түрсэн байдлаар гарч буй нь дарангуйллын шинжтэй үйлдэл гэдгийг УИХ-ын нэр бүхий гишүүд хэлж байна.

Тэгээд ч нийслэлчүүдийн нуруун дээр бууж буй татварын ачаалал ихэдсэн үү гэхээс багадаагүй. Түгжрэлийг бууруулах нэрийдлээр, зам ашигласны төлбөр, утааг бууруулах нэрийдлээр авто тээврийн хэрэгслийн албан татвар, торгууль, хураамжийг нэмсээр иргэд туйлдаж дууслаа. Гэвч хамгийн ноцтой нь, эдгээр шийдвэрийг хэрхэн, хэний саналаар гаргаж буй нь өөрөө асуудал болоод байна.

1.5 сая хүн амтай УБ хотод 900 мянга гаруй жолооч бий. Тэдэнд хамаатай асуудлыг хоёрхон хүний саналаар шийдсэн Х.Нямбаатарын баг өөрсдийгөө өмөөрч хууль тогтоогчидтой арсалдаж буй.  

Ардчиллыг жинхэнэ утгаар нь хэрэгжүүлдэг орнуудад олон нийтийн амьдралд шууд нөлөөлөх аливаа бодлого, татварын өөрчлөлт заавал иргэдийн оролцоо, хэлэлцүүлэг, судалгаанд үндэслэдэг гэдгийг хотын удирдлагууд мэдэх л учиртай.