Өргөдлийн байнгын хорооны хуралдаанаар Монгол Улсын 2026 оны төсвийн хүрээний мэдэгдэл, 2027–2028 оны төсвийн төсөөллийн тухай хуульд нэмэлт, өөрчлөлт оруулах тухай хуулийн төслийн хоёр дахь хэлэлцүүлэг, мөн Монгол Улсын 2026 оны төсвийн тухай хуулийн төсөл болон иргэдийн өргөдөл, гомдолтой холбогдсон хэд хэдэн асуудлыг хэлэлцлээ.

Тухайлбал, иргэн Б.Номингоос ирүүлсэн өргөдлийн дагуу эмч, багш нарын цалинг нэмэгдүүлэх асуудлыг судлах ажлын хэсэг байгуулах талаар хэлэлцэж, уг саналыг Байнгын хорооны гишүүдийн 73.4 хувь нь дэмжив.

Хуралдааны үеэр 2026 оны Төсвийн тухай хуулийн төсөлтэй холбогдуулан төсвийн хүрээний мэдэгдэл, урсгал зардлын хязгаарыг ДНБ-ий 24 хувьд барих тухай Төсвийн тогтвортой байдлын тухай хуулийн зохицуулалтыг танилцуулсан. Үүний дагуу 2026 оны урсгал зардлын хэмжээ 24.6 их наяд төгрөг, нийт төсвийн зарлага 32.9 их наяд төгрөг байхаар тусгагджээ.

Багш нарын цалинг 25 хувиар нэмэгдүүлэхэд 560 тэрбум төгрөг, харин багшийн дундаж цалинг 3.5 сая төгрөгт хүргэхэд нийт 3.3 их наяд төгрөг шаардлагатай гэсэн тооцооллыг холбогдох байгууллагууд танилцууллаа. Гэвч төсвийн хүрээнд цалин, тэтгэвэр, тэтгэмж нэмэгдүүлэх боломж хязгаарлагдмал байгааг Сангийн яам болон бусад холбогдох байгууллагууд тайлбарлав.

Мөн Сангийн яамнаас 2026 оны төсөвт тусгахаар ирүүлсэн нийт 14 их наяд төгрөгийн төсөл, хөтөлбөрөөс 3.2 их наяд төгрөгийн төсөл, хөтөлбөрийг авч, шаардлага хангаагүй 682 тэрбум төгрөгийн төслийг төсвөөс хасах шаардлагатайг гишүүд онцолсон.

Эрүүл мэндийн даатгалын шимтгэлийн хувьд, ЭМД-ын шимтгэл төлж буй иргэд болон төрөөс даатгалыг нь хариуцдаг иргэдийн хооронд 500 тэрбум төгрөгийн зөрүү байгааг салбарын сайд мэдээлж, даатгалын тогтолцоог сайжруулах шаардлагатайг тэмдэглэлээ.

Түүнчлэн нийтийн өргөдөл, гомдлын системийг сайжруулах журам батлах, холбогдох тогтоолын төслүүдийг хэлэлцсэн байна.