Америкийн “Apple”, “Microsoft” компаниудын хувьцааны ханш мягмар гарагт өссөнөөр зах зээлийн үнэлгээ нь 4 их наяд ам.доллароос дээшилжээ. 

Гэхдээ хоёр компани хоёулаа дэлхийн хамгийн үнэ цэнтэй компани болох “Nvidia”-гийн /4.6 их наяд ам.долларын үнэлгээтэй/ ард жагссан хэвээр байна. “Microsoft” зах зээлийн үнэлгээгээрээ энэ оны долоодугаар сард 4 их наяд ам.долларын босгыг давж байсан юм. Харин “Apple” компанийн хувьд үнэлгээ нь түүхэндээ анх удаа ийм хэмжээнд хүрснээр уг амжилтад хүрсэн түүхэн дэх гурав дахь компани боллоо. 

Тодруулбал, “OpenAI”-ийн 27 хувийн хувьцаатай холбоотой шийдвэрийг эцэслэсэн талаар мэдээ цацагдсаны дараа “Microsoft”-ын хувьцаа 2 хувиар өссөн байна. “Microsoft” нь 2019 оноос хойш “ChatGPT” чатботыг зохион бүтээгч эл компанийг дэмжиж ирсэн билээ.

Харин “Apple”-ийн хувьд анх удаа 4 их наяд ам.долларын босгыг давсан амжилт нь есдүгээр сард танилцуулсан “iPhone 17” гар утсууд нь өмнөх загваруудаасаа илүү сайн зарагдаж байгаатай холбоотойгоор сүүлийн долоо хоногуудад хувьцаа нь өссөнтэй холбоотой юм. “Apple”-ийн хувьцаа сүүлийн гурван сарын хугацаанд 25 хувиар өсжээ. Тус компани улирлын орлогын тайлангаа пүрэв гарагт танилцуулна.                                  Эх сурвалж: Монцамэ агентлаг