Японы Ерөнхий сайд Такаичи Санаэ мягмар гарагт тус улсын эдийн засгийн стратегийн төв штабын анхны хурлыг хийжээ. 

Тэрбээр эдийн засгийн өсөлтийг дэмжих зорилгоор аж үйлдвэрийн 17 салбарт бодлого боловсруулахыг сайд нарын танхимд үүрэг болгосон байна. Үүний зорилго нь ирэх зун гэхэд тодорхой стратеги боловсруулсан байх явдал юм.

Т.Санаэ хуралдааны үеэр мэдэгдэхдээ, нийлүүлэлтийн сүлжээг бэхжүүлж, тогтвортой эдийн засаг бүрдүүлэхэд чиглэсэн өсөлтийн стратегийг тууштай хэрэгжүүлэхээ мэдэгдэв. "Би та бүхнээс стратегийн салбаруудад тогтвортой, урт хугацааны санхүүжилтийн баталгааг хангаж, хөрөнгө оруулалтын орчныг сайжруулах тал дээр бодит арга хэмжээг боловсруулахыг хүсэж байна” гэж тэрбээр сайд нарт хандан хэлжээ.

Засгийн газар хиймэл оюун, усан онгоцны үйлдвэрлэл, батлан хамгаалах аж үйлдвэр зэрэг салбаруудыг тэргүүлэх чиглэл болгон тодорхойлжээ. Такаичи стратегийн 17 салбар тус бүрийг удирдах сайд нарыг томилсон байна. Төв штаб мөн хөдөлмөрийн зах зээлийн шинэчлэл, цалин хөлсний бодлого болон бусад асуудлыг хариуцах юм.

Үүнээс гадна хувийн хэвшлийн төлөөллөөс бүрдсэн зөвлөлдөх хороо байгуулжээ. Хорооны бүрэлдэхүүнд Японы Бизнес эрхлэгчдийн холбооны ерөнхийлөгч Цүцүи Ёшинобү, Үйлдвэрчний эвлэлүүдийн холбооны тэргүүн Ёшино Томоко нар багтжээ.             Эх сурвалж: Монцамэ агентлаг