АНУ-ын засаг захиргаа тус улсаас өөрийн хүсэлтээр гарч буй хууль бус цагаачдад олгох урамшууллыг 3 мянган ам.доллар болгож нэмэгдүүлэхээр шийдвэрлэжээ. 

Эх орондоо буцах хүсэлтээ он дуусахаас өмнө гаргасан хүмүүст уг урамшууллыг олгоно гэж АНУ-ын Дотоод аюулгүй байдлын сайд Кристи Ноэм мэдэгдсэн байна. 

“Зул сарын баярыг тохиолдуулан хууль бус цагаачдад өөрийн хүсэлтээр гарахад зориулсан урамшууллыг гурван дахин нэмэгдүүлэн өгч байна. Он дуусахаас өмнө CBP Home App аппликейшнээр өөрөө нутаг буцах хүсэлт гаргасан хууль бус цагаачид 3 мянган ам.долларын урамшуулал авах боломжтой” гэж тэрбээр X нийгмийн сүлжээний хуудсандаа бичжээ.

Урьд нь мэдэгдэж байсанчлан нисэх онгоцны тасалбарын үнийг АНУ-ын засгийн газар төлнө. Мөн цагаачлалын хууль зөрчсөнтэй холбоотой торгууль болон бусад шийтгэлүүдийг хүчингүй болгоно. 

Энэ оны нэгдүгээр сараас хойш 1.9 сая хууль бус цагаач сайн дураараа нутаг буцсан байна. 

Өөрийг нь засгийн эрхэнд гарахаас өмнө 25 сая орчим хүн АНУ-д хууль бусаар нэвтэрсэн гэж Ерөнхийлөгч Д.Трамп өмнө нь мэдэгдэж байв. Тэрбээр тангаргаа өргөснийхөө дараа АНУ-Мексикийн хил дээр онц байдал зарлах тухай зарлигт гарын үсэг зурсан бөгөөд хууль бусаар орж ирсэн цагаачдыг нутаг буцаах хамгийн өргөн хүрээтэй ажиллагааг хэрэгжүүлнэ гэдгээ онцолж байв.

                                                                                                   Эх сурвалж: Монцамэ агентлаг