Швейцарын өмнөд хэсэгт орших алдарт Кранс-Монтана цанын баазад байрлах “Le Constellation” нэртэй бааранд аймшигт гал түймэр гарч, шинэ жилийн баяраа тэмдэглэж байсан 40 орчим хүн амиа алджээ. Мөн 115 хүн хүнд, хөнгөн гэмтэл авсан талаар албаны эх сурвалжууд мэдээллээ. Гал түймэр шинэ оны анхны шөнө буюу нэгдүгээр сарын 1-ний өглөөний 01:30 цагийн орчимд дэгдсэн бөгөөд тухайн үед баранд баярын арга хэмжээ үргэлжилж байжээ. Гал богино хугацаанд хурдан тархсанаар барилгын дотор байсан хүмүүсийг гарч амжих боломжгүй болгосон гэж аврагчид мэдээлсэн байна. Орон нутгийн эрх баригчид галын шалтгааныг тогтоох мөрдөн шалгах ажиллагаа үргэлжилж байгаа ч одоогоор санаатай халдлага байсан гэх таамгийг үгүйсгэж байна.

Урьдчилсан байдлаар цахилгааны гэмтэл, дотоод заслын шатамхай материал галын тархалтад нөлөөлсөн байж болзошгүйг мэргэжилтнүүд онцолжээ. Кантон Валегийн цагдаагийн ахлагч Фредерик Гислер ойрын өдрүүдэд хийх гол ажил нь “нас барсан хүмүүсийн цогцсыг яаралтай таниулж, ар гэрийнхэнд нь хүлээлгэн өгөх” явдал болохыг мэдэгдсэн байна.

Галын улмаас олон хүний бие танигдахын аргагүй болсон тул ДНХ шинжилгээ хийх шаардлагатай болжээ. Хохирогчдын дунд олон улсын иргэн багтсан бөгөөд энэ нь аврах, таниулах ажиллагааг улам хүндрүүлж байна. Гамшгийн үед 13 нисдэг тэрэг, 42 түргэн тусламжийн автомашин, 150 гаруй аврагч ажилласан бөгөөд зарим хүмүүсийг барилгын дээд давхраас агаараар нүүлгэн шилжүүлжээ. Эмнэлгийн албаныхны мэдээлснээр, гэмтсэн хүмүүсийн ихэнх нь гүн түлэгдэлттэй, утаанд хордсон байдалтай олон хүний биеийн байдал хүнд байна. Орон нутгийн эмнэлгүүдийн хүчин чадал хүрэлцэхгүй болсон тул хохирогчдын заримыг Лозанн, Цюрих зэрэг томоохон хотуудын эмнэлгүүдэд шилжүүлэн эмчилж эхэлжээ.

Италийн Гадаад хэргийн яам 16 иргэн сураггүй алга болсон, 12–15 иргэн эмнэлэгт эмчлүүлж байгаа талаар мэдээлсэн бол Францын Гадаад хэргийн яам найман иргэн сураггүй хэвээр байгаа бөгөөд амиа алдсан хүмүүсийн дунд тэдний иргэд байж болзошгүйг мэдэгджээ.

Швейцарын ерөнхийлөгч Гай Пармелин энэхүү ослыг “манай улсын түүхэнд тохиосон хамгийн эмгэнэлт явдлуудын нэг” хэмээн тодорхойлж, амиа алдсан иргэдийн ар гэрт эмгэнэл илэрхийлсэн байна. Мөн засгийн газар аврагчид болон эмнэлгийн ажилтнуудад онцгой дэмжлэг үзүүлэхээ мэдэгджээ. Кранс-Монтана нь 1980-аад онд цанын дэлхийн аварга шалгаруулах тэмцээн зохион байгуулж байсан, олон улсын жуулчдын хамгийн их зорин очдог, тансаг зэрэглэлийн цанын баазуудын нэг юм. Олон арван жил үйл ажиллагаа явуулж ирсэн “Le Constellation” баар нь дээд давхарт спортын уралдаан тэмцээн дамжуулах том дэлгэцтэй, доод давхарт нь ууж, бүжиглэх зориулалттай том танхимтай алдартай цэнгээний газар байжээ. Энэхүү эмгэнэлт явдал Швейцар төдийгүй Европ даяар гүн цочрол төрүүлж, олон улс орнууд эмгэнэл илэрхийлсээр байна.