Хууль зүй, дотоод хэргийн сайд Баттөмөрийн Энхбаяр бол шинэ цагийн Үндсэн хуулийн эх баригч Б.Чимэдийн нарийн бичгийн даргаар ажиллаж байсан, Монголын толгой хуульчдын нэг С.Төмөр агсны шавь юм. Тэрбээр төрийн алба хийгээд улстөрд эрт чанагдсан нэгэн. Их улстөрд орж ирэхэд нь ёстой л мерит зарчмаар явсан, бэлтгэгдсэн сайн залуусын нэг хэмээн олзуурхаж байв. Парламентад мэргэжлийн, зарчимч чанараараа ялгарч, залуу ир мөрөө харуулан гялалзана гэж таньж мэддэг хүрээнийхэн, анд нөхөд нь итгэж байсан байх. Гэтэл тэр эхнээсээ л Ц.Нямдоржтой “үзэлцэж“ танигдав. Заа тэр яахав. Харин сүүлдээ жинхэнэ поп болж хувирлаа. Зүгээр ч нэг биш, хуулийн нэр барьж попрох бол аюултай. Нүүрсний сонсголыг удирдсан нь нэр хүндийг нь өргөсөн үү, эсвэл буруу бяд амтагдуулав уу юутай ч нэг л сүрхий шударга дүртэй, сүржин ам, даржин ажилтай нэгэн болж буулаа. Л.Оюун-Эрдэнийн Засгийн газарт байхдаа Ерөнхий сайдын сэлэмний ир, жадны үзүүр байя гэж попорсон. 2024 оны сонгуулийн дараа сайд болоогүйдээ хорссон хонзогногч болчихсон.

УИХ-ын дарга Н.Учрал баруун аймгуудад ажиллах үеэр Хууль зүй, дотоод хэргийн сайд Б.Энхбаяр иргэдтэй хийсэн уулзалтын үеэр аанай попорсоор ирэв. Авилга, хээл хахууль, албан тушаалын хэргүүд шийдэгддэггүй, хуулийн шатанд замхардаг нь үнэн. Энэ талаар дорвитой арга хэмжээ авч, хуулийн өөрчлөлтөөр зохицуулахаас өөр аргагүйд хүрсэн байна. Тиймээс ирэх хаврын чуулган эхлэнгүүт Прокурорын тухай хуульд нэмэлт, өөрчлөлт оруулах, Шүүхийн шийдвэр хэрэгжүүлэх тухай хуульд нэмэлт, өөрчлөлт оруулах зэрэг хуулийн төслөө бэлтгэж байгаа аж.

Гэхдээ хачин жигтэй мэдэгдлүүд хийсээр. Шалгагдаж байгаа зарим хүн “Далайн эрэгт зугаалж, амарч явна” хэмээн хурлын индэр дээрээс хов хөөв. Үнэндээ бол өөрийнх нь ажлын үзүүлэлт л дээ. Аливаа төрийн өндөр албан тушаалтан, ард иргэн хэн ч байлаа гэмт хэрэг хийсэн нь нотлогдож, шүүхийн шийдвэр гараагүй л бол гэртээ цуйвангаа идээд, гэдсээ илээд хэвтэнэ үү. Далайн эргээр зугаална уу сайд Б.Энхбаярт, даамай бидэнд хамаагүй хэрэг. Хуулийн сайд нь попын хаан, хэлмэгдүүлэгч, хонзогногч байх маш хортой. Энэ хор нийгэмд, эгэл олонд буувал, хуулийн байгууллагын шат шатанд шингэвэл юу болохыг төсөөлөхөд бэрх.

Б.Энхбаяр Монголын хуулийн байгууллагын системд ямар легас үлдээх гээд байна вэ. Харж л байя.

Б.Зөөлөн