Монголын үндэсний бөхийн холбоо ёс зүй, сахилга хариуцлагын асуудалд хатуу байр суурь баримталж, гаргасан шийдвэрүүд нь хэрэгжиж эхлээд байна. МҮБХ-ны Ёс зүй, сахилга хариуцлагын зөвлөлийн 2024 оны есдүгээр сарын 11-нд болсон ээлжит хурлаар баталсан шийдвэрүүдийн дагуу зарим бөхчүүдийн барилдах эрх сэргэсэн бол ноцтой зөрчил гаргасан нэр бүхий бөхчүүдийн хувьд хоригийн хугацаа хэвээр үргэлжилж байгаа юм.

Тус зөвлөлөөс барилдах эрхийг түдгэлзүүлэх хугацааг 2024 оны наймдугаар сарын 30-наас эхлэн тооцох шийдвэрийг МҮБХ-ны Ажлын алба хэрэгжүүлж эхэлсэн байна. Ингэснээр богино хугацааны шийтгэл авсан зарим бөх барилдаанд дахин оролцох боломжтой болсон бол урт хугацааны хориг ногдуулсан шийдвэрүүд хэвээр үргэлжилж буй юм.

Төв аймгийн Баянцагаан сумын 100 жилийн ойн баяр наадмын үеэр гарсан ёс зүйн зөрчил олон нийтийн анхаарлыг ихээхэн татсан. Түүхт ойн наадмын дэвжээнд зүй бус үйлдэл гаргаж, наадамчин олны болон зохион байгуулагчдын итгэлийг алдагдуулсан аймгийн начин Г.Болдбаатар, аймгийн начин М.Баасанцэнд, сумын заан М.Баасан нарыг Монгол бөхийн ёс жудгийг ноцтой зөрчсөнд тооцсон юм. Улмаар аймгийн начин Г.Болдбаатарыг нэг жил найман сарын хугацаанд, сумын заан М.Баасанг өмнөх удаа дараагийн зөрчлүүдийг нь харгалзан хоёр жилийн хугацаанд бүх шатны барилдаанд барилдахыг хориглосон шийдвэр гаргасан билээ.

Мөн Увс аймгийн Зүүнхангай сумын 100 жилийн ойн барилдаанд засуулаар ажиллаж байхдаа барилдаж буй бөхчүүдэд саад болсон, биеэ зохисгүй авч явсан, зохион байгуулагчдын тавьсан шаардлагыг биелүүлээгүй Ц.Даваасамбууг ёс зүйн зөрчил гаргасанд тооцож, хоёр жилийн хугацаанд бүх шатны барилдааны жаяг дэгийн багт ажиллуулахгүй байх шийтгэл ногдуулсан байна.

Үүнээс гадна улсын харцага Т.Бэгзсүрэн, улсын начин Б.Чимэдвандан, улсын харцага Ц.Мөнхбаяр, аймгийн заан Ц.Заяатүшиг нарын барилдах эрхийг тус бүр зургаагаас есөн сарын хугацаанд хориглосон шийдвэрүүд мөн адил хүчин төгөлдөр хэрэгжиж буйг МҮБХ мэдээлсэн.

Эдгээр шийдвэр нь “Үндэсний бөхийн барилдааны дүрэм”-ийн 4-р зүйл, Ёс зүйн дүрмийн 3-р зүйл, 6-р зүйлийн 6.1, 7-р зүйлийн 7.1, 7.5 дахь заалтуудыг үндэслэн, олон нийтийн гомдол шаардлага болон МҮБХ-ны Ажлын албаны саналд тулгуурлан гарсан байна. Холбогдох бөхчүүдээс тайлбар авах, баримт мэдээлэл цуглуулах зэрэг шалгалтын ажиллагааг хийсний эцэст шийдвэрлэсэн нь Монгол бөхийн ёс зүй, нэр хүндийг хамгаалах бодлогын нэг хэсэг гэдгийг онцолсон юм.