Үдийн хоол ба хүүхдийн эрх: Ялгаварлал бодлого болж эхэлж байна уу?
Үдийн хоолны асуудал нь боловсролын салбарын дотоод маргаан бус, Монгол Улс Үндсэн хуулиар баталгаажсан хүүхдийн эрх бодитоор хэрэгжиж байна уу гэдгийн бодит шалгуур юм. Хүүхдийг сурч буй сургууль, өмчийн хэлбэр, эцэг эхийн сонголтоор нь ялган ангилж, улмаар хоол хүнсээр нь ялгаатай хандаж эхэлбэл төр өөрөө ялгаварлалд суурилсан бодлогыг зөвшөөрч буй хэлбэр болно.
Хүүхдийн хөгжил, сурлагын амжилт нь зөвхөн хичээлийн хөтөлбөр, багшаар хязгаарлагдахгүй. Тогтмол, чанартай хооллолт нь анхаарал төвлөрөл, ой тогтоолт, сурах идэвхийн үндэс болдог. Өлссөн эсвэл дутуу хооллож буй хүүхдээс чанартай суралцах үр дүн хүлээх боломжгүй. Судалгаагаар Монголын сурагчдын сургалтын чанар олон улсын дунджаас доогуур хэвээр байгаа энэ үед хоол тэжээлийн асуудлыг бодлогоор ялгавартай шийдэх нь чанарын асуудлыг улам дордуулах эрсдэлтэй.
Өнөөдөр Монгол Улсад ерөнхий боловсролын 10 сурагч тутмын 1 нь буюу 10% нь төрийн бус өмчийн сургуульд суралцаж байна. 2025–2026 оны хичээлийн жилд 183 төрийн бус сургуульд 80,525 хүүхэд суралцаж байгаа нь улсын төсөвт жил бүр 200 орчим тэрбум төгрөгийн ачааллыг бодитоор хөнгөлж буй үзүүлэлт юм. Гэтэл эдгээр хүүхдүүдэд зориулж төсвийн дөнгөж 1.7%-ийг л хувьсах зардлаар олгож, үлдсэн бүх зардлыг эцэг эхчүүд өөрсдөө бүрэн хариуцаж байна.
Ийм нөхцөлд үдийн хоолны бодлогыг “төрийн” ба “төрийн бус” сургууль гэж ангилан, өмчийн хэлбэрээр нь ялгаж дэмжлэг үзүүлэх нь шударга ёсны зарчимд харшилна. Хүүхэд өөрөө сургууль сонгодоггүй. Эцэг эхийн сонголтоос үүдэлтэй ялгааг төрийн бодлогоор гүнзгийрүүлж, хоол хүнсээр нь ялган хандах нь хүүхдийн эрхийн шууд зөрчил юм.
Өнөөдөр үдийн хоол, маргааш сурах бичиг, нөгөөдөр эрүүл мэндийн үйлчилгээ гэх мэтээр хүүхдийн суурь эрхийг хэсэгчлэн хязгаарлах жишиг тогтох эрсдэл бодитоор үүсч байна. Тиймээс үдийн хоол бол зардал бус, хүүхдийн суралцах эрхийг бодитоор хэрэгжүүлэх төрийн хариуцлага, хүний хөгжилд чиглэсэн хөрөнгө оруулалт юм.
Та дараах линкээр орж саналаа өгөөрэй:
QR
СЭТГЭГДЭЛ БИЧИХ