MCS компанид 200 тэрбумын татвар чөлөөлсөн гэх мэдээлэл нь ташаа болохыг баримт нотолжээ

УИХ-ын гишүүн П.Сайнзоригийн “Засгийн газрын 55 дугаар тогтоолын улмаас төсөвт орох 200 тэрбум төгрөг алдагдах эрсдэлтэй” гэсэн үгнээс үүдэн, MCS компанид 200 тэрбумын татвар чөлөөлсөн мэт мэдээлэл цахим орчинд тарсан байна. Гэвч холбогдох баримтууд, албан тайлбаруудаас үзэхэд энэ нь ташаа мэдээлэл болохыг баримт шалгах төвөөс нотолжээ. 

2025 оны 08 дугаар сарын 20-нд Засгийн газар 55 дугаар тогтоолоор Ашигт малтмалын нөөц ашигласны төлбөр (АМНАТ)-ийг тооцох журамд өөрчлөлт оруулсан бөгөөд уг тогтоол нь биржээр арилжаалагдсан бүтээгдэхүүнд ногдуулж буй АМНАТ-ыг ил тод, зах зээлийн үнээр тооцох зохицуулалт юм. Улмаар, тогтоолын үйлчлэлийн хугацаанд АМНАТ-ийн хэмжээ өмнөх саруудаас буураагүй гэж Үндэсний статистикийн хороо мэдээлжээ.

Энэ шийдвэрийг зарим цахим хуудас, сошиалд буруу утгатайгаар “MCS-г татвараас бүрэн чөлөөлсөн” гэж тараасан байна. Тухайлбал, 2026 оны 02 дугаар сарын 23-нд Цүнх Мөнхөө нэртэй хуудас УИХ-ын гишүүн М.Нарантуяа-Нарагийн гэрт хулгай орсон тухай лайваас тасалсан богино бичлэгийг оруулсан бөгөөд уг бичлэгт “200 тэрбум төгрөгийг Ерөнхий сайд гуравхан сарын дотор MCS-т татвараас чөлөөлсөн” гэсэн агуулга явжээ.

Гэхдээ

• Биржийн арилжааг дэмжсэн шийдвэрийн хүрээнд өрсөлдөөнтэй арилжаанаас улсын төсөвт 120 гаруй тэрбум төгрөгийн нэмэлт орлого орсон.

• Шийдвэрийн үр дүнд иргэдэд ногдох 1072 хувьцааны ногдол ашгийн хэмжээ нэмэгдсэн.

• Хүнд нөхцөлд байгаа аж ахуйн нэгжүүдэд бодит дэмжлэг үзүүлсэн.

Иймд, П.Сайнзоригийн хэлсэн “төсөвт орж ирэх 200 тэрбум төгрөг алдах” гэх мэдээлэл нь бодитой үндэслэлгүй, гуйвуулсан мэдээлэл болох нь тогтоогджээ.