Ерөнхий сайд асан Лувсаннамсрайн Оюун-Эрдэнэ “Лхагвын тойм” ярилцлагын нэвтрүүлэгт оролцох үеэрээ Хууль зүй, дотоод хэргийн сайд Баттөмөрийн Энхбаярыг “Бодь” группээс 500 мянган ам.доллар авсан тухай “сонсож байсан” хэмээн мэдэгдсэн талаар ярив.

Тэгвэл уг мэдээлэлтэй холбоотойгоор ХЗДХ-ийн сайд Б.Энхбаяр тайлбар хийж, уг яриаг үндэслэлгүй, гүтгэлэг хэмээн няцаалаа.

Тэрбээр, “Намайг ‘Бодь групп’-ээс 500 мянган ам.доллар авсан гэж ‘сонссон’ гэж ярьж байна. Хамт байсан нэг хүн надад тэгж хэлсэн гэх боловч тэр хүн хэн болохыг огт хэлэхгүй байна. Хэрэв бодит хүн бол нэрийг нь ил тод зарлах хэрэгтэй. Яагаад нууж байгаа юм бэ” хэмээн мэдэгдэв.

Мөн “Бодь” групптэй байгуулсан оффтейк гэрээнүүдийг УИХ-ын сонсголын үеэр огт хэлэлцээгүй гэх агуулгатай ярианд тайлбар өгөхдөө, нийт зургаан оффтейк гэрээнээс дөрвийг нь Л.Оюун-Эрдэнийн тэргүүлсэн Засгийн газар өөрөө байгуулсан гэдгийг онцолсон байна. Тухайн үед тус компанийн гүйцэтгэх захирлаар А.Амундра ажиллаж байжээ.

Түүнчлэн “Бодь” групптэй холбоотой оффтейк гэрээний асуудал УИХ-ын сонсголын үеэр бүтэн нэг өдрийн турш хэлэлцэгдсэн гэдгийг дурдсан юм.

Харин “Голомт банк”-тай холбоотой асуудлаар Б.Энхбаяр “Голомтын Д.Баясгаланг Хөгжлийн банк болон Нүүрсний сонсголын үеэр нотлох баримтаар баталгаажуулж, хуулийн байгууллагад шилжүүлсэн хүн Монголын улс төрд надаас өөр байгаагүй” хэмээн мэдэгджээ.

Эцэст нь тэрбээр, “Л.Оюун-Эрдэнийн ярьж буй зүйлсэд логик алга. Энэ бол гүтгэлэг. Хэрэв шаардлагатай бол шууд нэвтрүүлэгт хамт орж, нүүр тулан мэтгэлцэхэд бэлэн байна. Тэр хүн өөрөө юу ярьж байгаагаа ч сайн ойлгохгүй байна” гэж байр сууриа илэрхийлсэн байна.