Сүүлийн хэд хоногийн улс төрийг харвал эрх баригчдын дотоод зөрчил гүнзгийрэх тусам гадна талын тоглогчид улам хөдөлж эхлээд байна.

Юу болж байна вэ гэдгийг энгийнээр задлая.

Нэгдүгээрт, УИХ дахь Ардчилсан намын бүлэг шууд бойкот зарлачихлаа. Ардчилсан нам УИХ-ын дарга Н.Учралыг албан тушаалаасаа буутал чуулганд суухгүй гэдэг нь улстөржсөн дарамт. Учир нь АН-ын бүлгийн дарга О.Цогтгэрэл тэргүүтэй 19 гишүүн Н.Учралыг УИХ-ын дарга болоход нь дэмжсэн кноп дарсан байдаг. Тэд улстөрийн ашигтай байрлал хүлээж байсан нь тодорхой. Тиймдээ одоо түүнийг бойкотолж, Ерөнхийлөгч У.Хүрэлсүхийн утсан хүүхэлдэй хэмээж буй.

Хоёрдугаарт, танхим дотор өөрөө гал асчихсан. Байгаль орчны сайд Б.Батбаатарыг өөрийнх нь нам болох Иргэний зориг ногоон нам дотроос нь “манай хүн биш” гээд шахаж эхэлсэн. Шинэ дарга Р.Батболд бүр Ерөнхий сайдад нь албан ёсоор шаардлага хүргүүлнэ гэж зарлачихлаа.

Гуравдугаарт, хоёр сайд аль хэдийнэ суудлаа өгөх өргөдлөө өгчихсөн. Эрчим хүчний сайд Б.Чойжилсүрэн, Боловсролын сайд П.Наранбаяр. Эхэндээ “тогтвортой байдлаа бодъё” гээд бариад үлдэх янзтай байсан ч одоо УИХ дээр шууд оруулж ирээд шийдүүлэх шат руу явж байна.

Эндээс гол улс төр эхэлж байгаа юм.

ХҮН нам дотроо аль хэдийнэ дараагийн нүүдлээ бодоод эхэлчихсэн. ХҮН нам Эрчим хүчний салбарыг авч үлдээд оронд нь Б.Найдалааг сайд болгох хувилбар яригдаж байна. Нөгөө талд Боловсролын сайдын суудал дээр Л.Энх-Амгаланг гаргаж ирэх тухай МАН дотор хэлэлцэж эхэлсэн гэх мэдээлэл явж байна.

Гэхдээ энэ бол зөвхөн сайдын сэлгээний асуудал биш. Үнэндээ том зураг дээр дараах хэдэн хувилбар зэрэг явж байна.

Ерөнхий сайд Г.Занданшатар Б.Чойжилсүрэнг явуулаад Б.Найдалааг оруулж ирэх үү
П.Наранбаярын оронд Л.Энх-Амгаланг тавих уу
Эсвэл бүр танхимаа цэвэрхэн тараагаад өөрөө огцорч дараагийн Монгол Улсын Ерөнхийлөгчийн сонгууль руу нэр төртэй орох уу

Энэ гурван хувилбар зэрэг яригдаж байна. Нөгөө талаас сөрөг хүчин шахалтаа нэмсээр байвал бүр өөр зураг гарч ирж магадгүй. Хэрвээ эрх баригч нам нөхцөл байдлыг ухаалгаар удирдаж чадвал сонирхолтой комбинац ч үүснэ гэж харж байна Н.Учрал Ерөнхий сайд болж, УИХ-ын даргаар Л.Энх-Амгалан очих хувилбар.

Өөрөөр хэлбэл, одоогийн зөрчил зөвхөн сайдын суудлын асуудал биш, бүр парламентын толгой, Засгийн газрын тэргүүн солигдох хэмжээний том нүүдэл рүү орчихоод байна.

Дээрээс нь нэг эрсдэл бий. Хэрвээ П.Наранбаярыг чөлөөлбөл ХҮН нам танхимаас гарна гэсэн дохио өгөөд байгаа. Тэгвэл хамтарсан Засгийн газар шууд ганхах нөхцөл үүснэ. Ингэвэл МАН дангаараа засаглах уу, эсвэл дахин эвсэл байгуулах уу гэдэг асуулт гарч ирнэ. Энэ бүхнийг ажиглаад гуравдагч хүчнүүд ч зүгээр суухгүй байна. Үндэсний эвсэл тэргүүтэй улстөрийн тоглогчид нөхцөл байдлыг анхааралтай ажиглаж, боломж гарвал орж ирэхэд бэлэн байдалд орчихсон. Товчхондоо, улс төр одоо “хүлээлтийн горим”-д биш, шийдвэр гаргах цэг дээр ирчихсэн. Хэн нэг сайд солигдох уу гэдэг биш, хэн нь хэнийг шахаж унагах вэ, эсвэл хэн нь хэнийг сольж гарч ирэх вэ гэдэг л гол асуудал болоод байна.