Сүүлийн өдрүүдэд улс төрийн хүрээнд анхаарал татаж буй сэдэв бол Засгийн газрын сайд нарын ээлжит “сэлгээ”. Г.Занданшатар тэргүүтэй Засгийн газраас салбарын хоёр сайд өөрийн хүсэлтээр чөлөөлөгдөж, оронд нь шинэ хүмүүсийг томилох асуудал УИХ-аар хэлэлцэгдэхээр болоод байна. Тодруулбал, Б.Чойжилсүрэн, П.Наранбаяр нар ажлаа өгч, тэдний оронд Б.Найдалаа, Л.Энх-Амгалан нарыг сайдаар томилохоор зэхээд байна.

Анх өнгөрсөн долоо хоногт уг томилгоог УИХ-д танилцуулах байсан ч ирц бүрдээгүй шалтгаанаар хойшилсон. Харин энэ долоо хоногийн пүрэв гарагийн чуулганы нэгдсэн хуралдаанд албан ёсоор оруулж ирэхээр төлөвлөснийг парламентын цахим хуудсанд мэдээлжээ. Гэхдээ энэ бол зүгээр нэг халаа, сэлгээ биш. Харин ч улс төрийн илүү гүн шалтгаантай, Засгийн газрын тогтворгүй байдлыг илтгэх шинжтэй үйл явц гэж олон нийт, ажиглагчид харж байна.

Б.Чойжилсүрэн, П.Наранбаяр нар өөрийн хүсэлтээр чөлөөлөгдсөн гэх ч нам доторх зөрчил, бодлогын алдаа, шүүмжлэл, олон нийтийн дарамт, эдийн засгийн гүйцэтгэлийн муу үзүүлэлт зэрэг шалтгаанууд цаана нь нуугдаж буй.

Сүүлийн саруудад инфляц өсч, өрхийн бодит орлого буурч, төсвийн сахилга бат сул байгаа талаар эдийн засагчид шүүмжилж байна. Тухайлбал, 2025 оны эцсийн байдлаар инфляц 10 орчим хувьд хэлбэлзэж, импортын хамаарал өндөр хэвээр байгаа нь Засгийн газрын бодлогын үр дүнг асуухад хүргэж байгаа. Нөгөөтэйгүүр ийм нөхцөлд сайд нарын хариуцлагын асуудал яригдах ёстой ч чөлөөлөгдөх өргөдлөө өгөөд л асуудлаас зугтаачихаж байна.
Л.Энх-Амгалан өмнө нь боловсролын салбарт ажиллаж байсан, туршлагатай улс төрч. Харин Б.Найдалаа нь харьцангуй шинэ, технократ өнгө аястай хүн гэж үнэлэгддэг.

Гэхдээ асуудал хувь хүн дээр бус, системдээ л байгаа юм.Бодлогын залгамж чанар сул, бараг үгүй гэхэд хэлсдэхгүй, засгийн газрын дотоод тогтвортой байдал муу, намын нөлөө хэт давамгай гэдэг асуудлууд шийдэгдэхгүй бол хэн сайд болох нь төдийлөн ялгаагүй.

Сүүлийн 10 жилд дунджаар Засгийн газар 1.5–2 жилийн настай явж ирсэн. Нэг Засгийн газар дунджаар 2-3 удаа сайд нараа сольдог гэсэн судалгаа бий. Бодлого тогтвортой хэрэгжих хугацаа хүрдэггүй, хариуцлага бодитоор тооцогддоггүй, түр зуурын улс төрийн шийдлүүд давамгайлдаг. Өөрөөр хэлбэл, сайд солих нь асуудлыг шийдэх биш, харин асуудал байгаагийн илрэл юм.

Ингэж сэлгээ хийсээр байгаад энэ Засгийн газар огцорно. Учир нь эдийн засгийн дарамт буурахгүй байна, улс төрийн дотоод зөрчил ил болсоор байна, парламентын ирц хүртэл бүрдэхгүй хэмжээнд сахилга бат мууджээ. Энэ нөхцөлд хоёр сайдыг сольсон ч бодлогын том өөрчлөлт харагдахгүй бол Засгийн газрын хувь заяа урт настай байх магадлал бага.