Хятадад шүүхийн үйлчилгээг иргэдэд илүү ойртуулах зорилгоор “Court on wheels” буюу “дугуйтай шүүх” хэмээх хөдөлгөөнт шүүхийн тогтолцоог зарим бүс нутагт нэвтрүүлэн ашиглаж байна. Энэхүү үйлчилгээ нь алслагдсан хөдөө орон нутаг, зам тээврийн нөхцөл хүнд бүсэд амьдардаг иргэдэд шүүхийн үйлчилгээг шууд очиж хүргэхэд чиглэдэг ажээ.

“Дугуйтай шүүх” нь тусгайлан тоноглосон автомашин эсвэл фургонд суурилсан хөдөлгөөнт шүүхийн танхим юм. Үүнд шүүгч, шүүхийн ажилтнууд ажиллаж, иргэдийн маргааныг газар дээр нь шийдвэрлэх, эвлэрүүлэн зуучлах, мөн хууль эрх зүйн зөвлөгөө өгөх боломжтой байдаг. Зарим тохиолдолд шүүх хуралдааныг ч мөн тухайн хөдөлгөөнт шүүх дээр явуулдаг байна.

Энэхүү системийн гол зорилго нь шүүхийн хүртээмжийг нэмэгдүүлэх, иргэдийн цаг хугацаа болон зардлыг хэмнэх явдал юм. Ялангуяа уул, хээрийн алслагдсан тосгон сууринд амьдардаг иргэд шүүхэд хандахын тулд олон зуун километр зам туулах шаардлагатай байдаг тул хөдөлгөөнт шүүх нь бодит шийдэл болж байна.

Мөн “дугуйтай шүүх” нь зөвхөн маргаан шийдвэрлэхээс гадна иргэдэд хууль эрх зүйн боловсрол олгох, эрх зүйн зөвлөгөө өгөх, маргааныг эвлэрүүлэн зохицуулах зэрэг олон төрлийн үйлчилгээг нэг дор үзүүлдэг. Ингэснээр жижиг маргаан, иргэний хэрэг зэрэг асуудлыг шүүхийн шатанд хүргэхээс өмнө газар дээр нь шийдвэрлэх боломж бүрддэг байна.

Хятадын зарим мужид хэрэгжиж буй энэхүү хөдөлгөөнт шүүхийн үйлчилгээ нь иргэдийн шүүхэд хандах боломжийг нэмэгдүүлэх, орон нутгийн маргааныг шуурхай шийдвэрлэх, хууль дээдлэх зарчмыг бэхжүүлэхэд чухал үүрэг гүйцэтгэж байгаа талаар албаныхан онцолжээ.

Эх сурвалж: China Daily, Supreme People’s Court of China.