Сүүлийн өдрүүдэд улс төрийн нөхцөл байдал огцом эргэж, Засгийн газрын дараагийн бүтэц, шинэ Ерөнхий сайдын асуудал анхаарлын төвд орлоо. Ялангуяа Ням-Осорын Учралын нэр хүчтэй яригдаж, түүнийг дараагийн Ерөнхий сайдаар томилох тохироо үндсэндээ хийгдэж дууслаа.

Н.Учрал сүүлийн жилүүдэд төрийн бодлогын чухал салбаруудыг хариуцаж, өөрийгөө бэлтгэж ирсэн улстөрч юм. Тэрээр дижитал хөгжил, инновацын чиглэлээр ажиллаж, шинэ үеийн, технологид ойр лидерийн имижийг бүрдүүлж чадсан.

Гэвч түүнийг Ерөнхий сайдад дэвшүүлэх гол шалтгаан нь зөвхөн хувь улстөрчийн чадвар биш. Нам доторх фракцуудын тэнцвэр, томоохон улстөрчдийн зөрчил дундаас “аль аль талдаа хүлээн зөвшөөрөгдөх” хувилбар хэрэгтэй болсон нь түүнийг ийнхүү гаргаж ирж байна. Өөрөөр хэлбэл, Н.Учрал бол энэ нөхцөлд хамгийн боломжит компромисс шийдэл болж байна.

Шинэ Засгийн газар богино хугацаанд бүрдэх төлөвтэй байгаа бөгөөд одоогийн байдлаар бүрэлдэхүүний хувьд залгамж чанар + шинэчлэл хосолсон бүтэц бүрдэх магадлал өндөр байна. Засгийн газрын зарим чухал чиглэлд тогтвортой байдлыг хадгалах шаардлага тулгарч байна. Үүнд сангийн бодлого, гадаад харилцаа, батлан хамгаалах, хууль хүчний байгууллагууд нэрлэгдэж буй. Эдгээр салбарт одоогийн сайд нараас тодорхой хүмүүсийг үлдээх нь эдийн засаг, гадаад орчны тогтвортой байдлыг хадгалах зорилготой. Харин нийгэмд шууд нөлөөлдөг, шүүмжлэл дагуулдаг салбаруудад өөрчлөлт хийх шаардлага өндөр байна. Үүнд боловсрол, эрүүл мэнд, хот байгуулалт, соёл, спортын салбарууд орж буй. Эдгээр салбарт Н.Учрал өөрийн багийг бүрдүүлж, илүү залуу, шинэ имижтэй хүмүүсийг оруулж ирэх хүлээлт байна.

Шинэ Засгийн газрын хамгийн анхаарал татсан асуудлын нэг бол Г.Занданшатарын оролцоо юм. Түүнийг танхимд урьж ажиллуулах тухай яриа улс төрийн хүрээнд хүчтэй байна. Үүнийгээ ч Н.Учрал ил цагаан хэлчихэж харагданалээ. Энэ нь хэд хэдэн зорилготой алхам гэж үзэж болно. Нэгдүгээрт, Ерөнхийлөгчийн дэмжлэгтэй хүнийг Засгийн газарт татан оролцуулж, дотоод зөрчлийг намжаах. Хоёрдугаарт, түүний хувьд гүйцэтгэх засаглалд ажиллаж, бодит үр дүн гаргах замаар олон нийтийн дунд эерэг имиж бүрдүүлэх боломж юм. Ялангуяа ойрын хугацаанд болох Ерөнхийлөгчийн сонгуулийг харгалзан үзвэл энэ алхам нь зөвхөн Засгийн газрын бүрэлдэхүүнтэй холбоотой биш, илүү урт хугацааны улс төрийн стратегийн нэг хэсэг гэж харагдаж байна.

Ийнхүү бүрдэх гэж буй Засгийн газар нь зөвхөн шинэ Ерөнхий сайд томилох асуудал биш. Нам доторх хүчний харьцааг дахин тэнцвэржүүлэх, ирэх сонгуулиудад бэлтгэх, олон нийтэд шинэ дүр төрх харуулах гэсэн гурван зорилгыг зэрэг агуулах ёстой бөгөөд үүнийг ч Н.Учрал мань мэтээр хэлүүлэлтгүй мэдэх хэрэг биз. Н.Учралын Засгийн газар бүрдвэл түүний өмнө хамгийн том сорилт нь фракцуудын тэнцвэрийг хадгалах, бодлогын залгамж чанарыг алдагдуулахгүйгээр шинэчлэл хийх явдал байх болно. Харин Г.Занданшатарын хувьд Н.Учралын санал Ерөнхийлөгчийн сонгуулийн өмнөх улс төрийн байр сууриа бэхжүүлэх чухал боломж болж байна. Товчхондоо, энэ удаагийн Засгийн газрын өөрчлөлт нь дараагийн улс төрийн том цикл хэрхэн эхлэхийг харуулна.