АНУ-ын Ерөнхийлөгч Дональд Трамп Ираны эсрэг цэргийн ажиллагааны талаар ширүүн мэдэгдэл хийж, тус улсыг “нэг шөнийн дотор бүрэн устгах боломжтой” хэмээн онцоллоо. 

Сэтгүүлчдийн “Ирантай холбоотой нөхцөл байдал намжиж байна уу, эсвэл хурцдаж байна уу?” гэсэн асуултад Трамп тодорхой хариу өгөхөөс зайлсхийж, “Би хэлж чадахгүй. Тэд юу хийхээс бүх зүйл шалтгаална” гэж мэдэгджээ.

Түүнчлэн Трамп Ираны цахилгаан станцуудыг богино хугацаанд устгах боломжтой гэж мэдэгдэж, “Бид хүсвэл ирэх шөнө 12 цаг гэхэд бүх цахилгаан станцыг устгаж чадна. Тэд шатаж, дэлбэрч, дахин ашиглагдах боломжгүй болно” хэмээн хэлсэн байна. Мөн ийм хэмжээний сүйрлийг сэргээхэд “100 жил шаардагдана” гэлээ.

Ерөнхийлөгчийн хэлснээр, АНУ ийм ажиллагааг дөрвөн цагийн дотор ч гүйцэтгэх боломжтой ч “ийм зүйл болохыг хүсэхгүй байна” гэдгийг онцолсон байна.

Мягмар гарагт Трамп Иранд тавьсан 20:00 цагийн хугацаа эцсийнх гэдгийг дахин мэдэгдсэн ч өмнө нь ижил төрлийн хугацааг хэд хэдэн удаа өөрчилж байсан удаатай.

Мөн тэрбээр Иранд чиглэсэн агаарын цохилтууд нь иргэний дэд бүтцэд хохирол учруулсан ч энэ нь дайн гэмт хэрэгт тооцогдох эсэх талаар “санаа зовохгүй байна” гэж өмнө нь хэлж байв.

Харин Трамп Ираныг хэлэлцээрт “идэвхтэй, сайн дурын оролцогч” гэж тодорхойлж, хоёр талын яриа хэлэлцээ тодорхой сувгаар үргэлжилж байгааг дурдсан байна.