Монгол улсад 2017 оноос хойш гэр бүлийн хүчирхийллийн гэмт хэргийн улмаас 100 гаруй хүн амь насаа алдаж, олон мянган иргэн эрүүл мэнд, сэтгэл зүй, амьдралаараа хохирсон гэх тоо баримт байна. Хохирогчдын дунд хүүхэд, эмэгтэйчүүд зонхилж байна. Гэр бүлийн хүчирхийлэлтэй холбоотой зөрчил, гэмт хэрэг өдрөөс өдөрт нэмэгдэн, нийгмийг түгшээсэн хүнд хэлбэрт шилжиж байна. Иймд гэр бүлийн хүчирхийлэлтэй тэмцэх тогтолцоог шинэ шатанд гаргах хууль, эрх зүй, бодлогын шинэчлэл, нийгмийн ойлголтыг өөрчлөх зорилготой “Гэр бүлийн хүчирхийллээс хамгаалах, хохирогчийг дэмжих” үндэсний хөтөлбөрийг хэрэгжүүлэхээр санаачлаад байна. Хөтөлбөрийн хүрээнд хууль эрх зүй, бодлогын шинэчлэл хийхээс гадна нийслэлийн Сүхбаатар дүүрэгт Япон улсын шилдэг туршлагыг нэвтрүүлж гэр бүлийн хүчирхийллийн хохирогч нарыг хамгаалах, дэмжих цогц үйлчилгээ үзүүлэх “Жишиг нэг цэгийн үйлчилгээний төв”-ийг байгуулж Монгол улсад нутагшуулах үйл ажиллагааг хэрэгжүүлнэ.