Азербайжаны Баку хотноо Дэлхийн Бөхийн Нэгдсэн Холбоо (ДБНХ)-ноос зохион байгуулж буй өсвөрийн буюу u17 хүртэлх насны Дэлхийн Аварга Шалгаруулах Тэмцээн (ДАШТ)-д улсаа төлөөлөн 65 кг-ын жинд өрсөлдөж буй Болдбаатарын Ариунзул Казахстаны Айша Абдималикийг 4:0-ээр буулган авснаар u17 хүртэлх насанд дэлхийн аварга болсон анхны Монгол тамирчин боллоо. Энэ удаад таарсан энэхүү хоёр тамирчин өмнө нь 17 хүртэлх насны Азийн Аварга Шалгаруулах Тэмцээн (ААШТ)-д учраа таарч байсан бөгөөд  Б.Ариунзул 11:2-оор илүүрхэж улмаар тус тэмцээнээс хүрэл медаль хүртэх замаа засаж байсан түүхтэй. 

Б.Ариунзул энэ удаад эхний даваанд Украины Ирына Бухтинаг 5:0-ээр ялж, мөн шөвгийн наймд Узбекистаны Шахзода Азимоварг 11:0-ээр оноогоор цэвэр, хагас шигшээд Беларусийн Палина Брахинетсийг 7:1-ээр тус тус ялж аваргын төлөө өрсөлдөж ийнхүү Дэлхийн аварга цолыг хүртлээ.

Энэ жинд хүрэл медалийг Молдавын Маргарита Лисита, Беларусийн Палина Брахинетс нар хүртлээ. 

Одоогоор охидын ангилалд багийн дүнгээр Украинчууд тэргүүлж буй. Тэд аль ч жинд аваргалж амжаагүй ч багаараа жигд оролцсон тул 69 оноогоор бусдыгаа манлайлж байгаа бол араас нь АНУ хоёр жинд алт авснаар 67 оноо, нэг жинд түрүүлсэн үзүүлэлтээр Япон 55 оноогоор жагсаж буй.

Тэдний араас Энэтхэг 52 оноогоор дөрөвдүгээрт жагссан бол Б.Ариунзулын 25 оноог нэмэрлээд Монголын баг 39 оноогоор тавдугаарт бичигдэж байна.