Тайландын Паттая хотод долдугаар сарын 26-ны өглөө гэрээсээ мотоцикльтой гарч, түүнээс хойш сураггүй болсон ОХУ-ын иргэн 22 настай Диана Назимова болон түүний 17 настай дүү Роман Назимова нарын цогцсыг цагдаагийнхан олжээ.

Ах, эгч хоёр гэрээсээ гарсныхаа дараа ар гэрийнхэнтэйгээ холбоо тасарсан бөгөөд гар утаснууд нь удалгүй унтарсан байна. Гэр бүлийнхэн нь тэднийг эрэн хайх хүсэлт гаргасны дараа Тайландын цагдаа, аврах албаны ажилтнууд болон сайн дурынхан өргөн хүрээтэй эрэн хайх ажиллагааг эхлүүлжээ.

Тэд ОХУ-ын Тюмень хотоос Тайландад 2018 оноос хойш суурин амьдарч байгаа гэр бүлийн хүүхдүүд юм байна. 

Цагдаагийн байгууллага нэлээд өргөн хүрээнд эрлийн ажиллагаа явуулж, өмнө нь гэмт хэрэгт удаа дараа холбогдож байсан 43 настай Понг, 39 настай Тонг гэх хүмүүсийг сэжиглэн хайж эхэлсэн ба хүүхдүүдийн унаж явсан мотоциклийг оршуулгын газар булсан байхыг олжээ.

Удалгүй Понгийг хамтрагчийн хамт Камбожийн хилээр нэвтрэх гэж байхад нь барьсан байна. Байцаалтын үеэр тэд хэргээ хүлээж, мотоциклийг авах зорилготой байсан гэж ярьжээ. Роман хүү эсэргүүцэл үзүүлсний улмаас буудаж алаад, эгчийг нь зодож алсан байна. 

Диана охин хэрэг болохоос хэд хоногийн өмнө ээждээ өөрийнх нь утсанд хэн нэгэн Bluetooth-ээр нэвтэрсэн, байршлыг нь ажиглаж байх шиг санагдсан тухай хэлж байжээ. 

Эдгээр гэмт хэрэгтнүүдийг бүлэг гэж үзэж байгаа ба сэжиглэгдэж байгаа толгойлогч одоогоор баригдаагүй байна. 

Хэрэгтнүүдийн заасан газраас хүүхдүүдийн шарилыг 7 сарын 31-ний өдөр олж гаргах үеэр өөр таван хүний цогцос олдсон тухай Thairath мэдээлжээ. 

Тайланд бол хүний наймаа, гэмт хэргээр алдартай газар бөгөөд жил бүр маш олон хүн сураггүй алга болдог. Аялж амарч дуусаад буцаж нисэх гэж таксигаар нисэх буудал хүргүүлээд сураггүй болсон тохиолдол их байдаг ба хэд хоногийн дараа ой санамжгүй болсон байдалтай олдсон хүмүүс олон байна. Зөвхөн Орос улсын иргэдийн хувьд л гэхэд байнга оршин суудаг иргэдийн сайн дурын эрлийн баг хүртэл бий болж, нэгдсэн зохион байгуулалттайгаар алга болсон хүмүүсийг эрэн хайх, орон нутгийн цагдаагийн байгууллагатай хамтарч ажиллах, ой санамжаа алдсан болон бичиг баримтгүй болсон хүмүүст хууль зүйн туслалцаа үзүүлдэг болоод удаж байгаа юм байна. 

Энэхүү хэрэг Тайланд даяар төдийгүй олон улсын хэмжээнд өргөн анхаарал татаж, олон мянган хүн нийгмийн сүлжээгээр ах, эгч хоёрыг эсэн мэнд олдоосой хэмээн уриалга, мэдээллийг түгээж байсан юм. Харамсалтай нь тэднийг амьд олж чадалгүй, эмгэнэлт төгсгөлөөр дууссан нь олон нийтийг цочирдуулжээ.