Монгол Улсын Зэвсэгт хүчний цэргийн баг Бүгд Найрамдах Хаити Улсад явагдаж буй ‘’Гэмт бүлэглэлтэй тэмцэх хүчин’’ ажиллагааны өмнөх бататгах сургалт, шалгалтад амжилттай хамрагдаж, цэргийн хүчний командлагчийн тушаалын дагуу ‘’Вертиерес’’ баазын аюулгүй байдлыг хангах үндсэн үүргийг Чад Улсын цэргийн багаас хүлээн авч томилгоот үүргээ гүйцэтгэж эхэлсэн талаар Зэвсэгт хүчний Жанжин штабаас мэдээллээ. 

Ажиллагааны өмнөх бататгах сургалтаар ажиллагааны мандат, цэргийн хүчний бүтэц, зохион байгуулалт, ажиллагааны цагийн байдал, НҮБ-ын хүч хэрэглэх дүрэм, хүний эрхийг хангах, энгийн иргэдийг зэвсэгт халдлагаас хамгаалах болон ажиллагааны үеийн харилцан ажиллагаа зэрэг үндсэн чухал чиглэлээр нэгдсэн ойлголт, мэдээлэл авсан байна. 

Мөн бусад улсын цэргийн багуудтай харилцан ажиллах, ажлын уялдаа холбоог нарийн тодотгон баазын аюулгүй байдлыг хангах төлөвлөлтийг хийж, үүрэг гүйцэтгэх бэлтгэлээ бүрэн хангаад байгаа аж. 

Хаити Улс дахь Гэмт хэргийн бүлэглэлтэй тэмцэх НҮБ-ын мандат бүхий олон улсын цэргийн ажиллагааны Цэргийн хүчний командлагчаар Монгол Улсын Зэвсэгт хүчний Хошууч генерал Б.Эрдэнэбат томилогдон ажиллаж байгаа юм. Тэрбээр 2024-2025 онд НҮБ-ын Кипр дахь Энхийг сахиулах ажиллагааны хүчний командлагчаар амжилттай ажиллаад ирсэн юм. 

Мөн Өмнөд Судан Улсад 2013-2014 онд үүрэг гүйцэтгэсэн 850 хүний бүрэлдэхүүнтэй Монгол Улсын батальоныг ахалж байв. Түүнчлэн генерал Б.Эрдэнэбат Ирак, Либери, Судан, Өмнөд Суданд, Сьерра Леон зэрэг улсад энхийг сахиулах найман удаагийн ажиллагаанд үүрэг гүйцэтгэжээ. 

Энэ оны тавдугаар сараас үүрэгт ажилдаа орсон ажиллагааны хүчний штабын бүрэлдэхүүн ажиллагааны төлөвлөлт, стратегийн үнэлгээ хийх, олон улсын цэргийн багуудыг хүлээн авах бэлтгэл хангах, цэргийн тусгай ажиллагааг удирдан зохион байгуулах чиглэлээр ажилласан байна.  

Харин ажиллагаанд үүрэг гүйцэтгэх Монгол Улсын цэргийн баг үндсэн бүрэлдэхүүнээрээ ажиллагааны газар оронд өнгөрсөн наймдугаар сард очсон юм.