Киргизстан Улсын Бишкек болон Чолпон-Ата хотуудад 08 сарын 31-нээс 09 сарын 06-ны өдрүүдэд зохион байгуулагдсан "Дэлхийн нүүдэлчдийн VI наадам" нь спортын 43 төрөлд 106 улсын 2355 төлөөлөгчид оролцлоо. Наадмын сүүлийн өдрүүдэд Ираны пахлавани бөхийн +90 кг төрөлд 36 орны бөхчүүд оролцсоноос Монгол Улсын тамирчин Б.Бат-Орших, оюун ухааны спорт есөн хоргол “Тогыз хумалах” тэмцээнээс эрэгтэй багийн төрөлд Х.Ерманат, Ш.Болатбек нар тус тус хүрэл медаль хүртсэн.

Наадмын нэгдсэн дүнгээр 29 орны баг тамирчид медаль хүртэж, үүнээс 12 орны тамирчид алтан медальтан болж Казахстан, Киргизстан, ОХУ-ын баг тамирчид эхний гурван байрт шалгарч, Узбекстаны баг шагналт 5 дугаар байрт орлоо.

Монгол Улс спортын 27 төрөлд 135 төлөөлөгчид оролцож алт 4, мөнгө 4, хүрэл 18, нийт 26 медаль авч нэгдсэн дүнгээр 106 орноос 4 дүгээр байрт шалгарлаа.

Монголын баг тамирчдаа дэмжиж, наадмын нээлтэд оролцсон Монгол Улсын Ерөнхийлөгч Ухнаагийн Хүрэлсүх, Соёл, спорт, аялал жуулчлал, залуучуудын сайд Ж.Алдаржавхлан, Монгол Улсаас Бүгд Найрамдах Киргиз Улсад суугаа Элчин сайдын яам, Биеийн тамир, спортын улсын хороо, Монголын үндэсний спортын хороо, тамирчдын бэлтгэл сургуулилтыг хангасан спортын төрөл бүрийн үндэсний холбоодын удирдлага, дасгалжуулагч, баг тамирчдад талархал илэрхийлье.

Эх орныхоо нэрийг дэлхийн тавцанд өндөрт өргөж, оюуны спорт, өв уламжлалаа сурталчлан, хичээл зүтгэл, ур чадвараа дайчлан өрсөлдсөн нийт тамирчид, медалийн эзэд болон амжилттай оролцсон Монгол Улсын тамирчид, наадмын үйл ажиллагааг ард түмэндээ хүргэн шууд дамжуулалт хийсэн телевизийн удирдлага, сэтгүүлч нарт халуун баяр хүргэе.