Йемений олон улсад хүлээн зөвшөөрөгдсөн Засгийн газар Ираны дэмжлэгтэй Хусит босогчдын хяналтад байгаа газар нутгийг эргүүлэн авах зорилгоор томоохон хэмжээний цэргийн ажиллагаа эхлүүллээ.

Йемений Ерөнхийлөгчийн зөвлөлийн тэргүүн Рашад аль-Алими аравдугаар сарын 4-нд телевизээр мэдэгдэл хийхдээ Засгийн газрын хүчнийхэн Хуситуудын эзэмшилд байгаа үлдсэн бүх газар нутгийг эргүүлэн авах хүртэл ажиллагааг үргэлжлүүлнэ гэж мэдэгдсэн байна.

Хуситууд 2014 оноос хойш нийслэл Санаа болон Йемений хүн амын дийлэнх хэсэг амьдардаг баруун хойд нутгийн томоохон хэсгийг хяналтдаа байлгаж байгаа юм. Харин өнгөрсөн сард тус бүлэглэл стратегийн ач холбогдолтой Баб-эль-Мандебын хоолой болон Улаан тэнгисийн эргийн ойролцоогоор 150 км хэсгийг эзэлсэн нь нөхцөл байдлыг улам хурцатгажээ.

Баб-эль-Мандеб нь Европ, Ази, Ойрх Дорнодыг холбосон олон улсын усан тээврийн чухал гарц юм. Үүний зэрэгцээ Хуситууд Саудын Араб дахь газрын тосны байгууламжууд руу пуужин, нисгэгчгүй онгоцоор цохилт өгсөн гэж мэдэгдсэн байна. Мөн Баб-эль-Мандебын ойролцоо явсан худалдааны хөлөг онгоц дэлбэрэлтүүд бүртгэгдсэн талаар мэдээлжээ. Шинэ цэргийн ажиллагаа нь Йемений олон жилийн дайныг дахин эрчимжүүлэхээс гадна Улаан тэнгисийн олон улсын худалдаа, газрын тосны тээвэрлэлтийн аюулгүй байдалд шууд нөлөөлөх эрсдэлтэй байна.