УИХ-ын нэгдсэн чуулганаар Засгийн газрын зарим гишүүдийг томилох эсэх асуудлыг хэлэлцэж байна. Эрүүл мэндийн сайдаар Н.Хүрэлбаатарыг томилох асуудлыг дэмжлээ. Ингэснээр Монгол Улсын Сангийн сайдаар Д.Хаянхярваа, Батлан хамгаалахын сайдаар Ж.Энхбаяр, Зам тээвэр, барилга, хот байгуулалтын сайдаар Ц.Дашдорж, Байгаль орчин, аялал жуулчлалын сайдаар Д.Цогтбаатар, Эрүүл мэндийн сайдаар Н.Хүрэлбаатар нарыг томилж байгааг УИХ-ын дарга Д.Дэмбэрэл зараллаа. Харин үүний дараа Монгол Улсын Ерөнхий сайд С.Батболд чуулганд оролцогчдод хандаж үг хэллээ. Тэрбээр “Манай нам 2008 оны УИХ-ын сонгуулиар ялалт байгуулсан ч улс орныхоо эрх ашгийг хүндэтгэж, эрсдэлтэй боловч эрэмгий алсыг харсан 90 жилийн түүхтэй намаас гарах улс төрийн шинэ сэтгэлгээ, зөвшилцлийг соёлыг монголын улс төрд оруулсан улс төрийн шийдвэр байсан. Энэ шийдвэрийг монголын нийгэмд ойлгуулахад хүнд байсан. Тийм дээ ч стандарт бус гэгдэж байсан. Ардчилсан нам гурван жил гаруйн өмнө Хамтарсан Засгийн газарт орох саналыг хүлээн авч байсан боловч ханилж яваад замаасаа буцлаа. Хамтарсан Засгийн газар үйл ажиллагаагаа явуулж байх үед хамтарч ажиллаа гэсэн шүүмжлэл биш, харин хамдаа байгаа хэрнээ ажлаа хийхгүй байна гэсэн шүүмжлэлд өртдөг байлаа. Хамтарсан Засгийн газар нэрийн дор АН, МАН хамтдаа хариуцлага хүлээж ирсэн. Харин одоо МАН дангаараа хариуцлага хүлээх боллоо. Ажил хийвэл дуустал гэдэг. Бид зорьсондоо хүрч, амлалтаа биелүүлнэ. Улс орныхоо том эрх ашиг, сонирхолын төлөө бид эрх мэдлээ хувааж чаддаг гэдгээ харуулсан шигээ үлдсэн хугацаанд ажиллана. Энэ хугацаанд амалсан амлалтуудыг хүний манай гэж ялгалгүй ажиллана”  гэв.  Түүнийг ийн хэлсний дараа УИХ-ын нэгдсэн чуулганыг завсарлууллаа. С.Заяа