Сагсан бөмбөгийн “Мөнгөн цагариг” клубээс 12 дахь жилдээ зохион байгуулсан сэтгүүлчдийн сагсан бөмбөгийн аварга шалгаруулах тэмцээн амралтын өдрүүдэд болж өндөрлөлөө. Энэ тэмцээнд эрэгтэй 22, эмэгтэй 12 багийн тамирчид өрсөлдсөнөөс эрэгтэйчүүдээс “Sport Box-1” баг аваргалж алтан медаль хүртлээ. Удаах байруудад “Btv” телевизийн баг, “Улс төрийн тойм” сонины багууд шалгарч мөнгө, хүрэл медалийн эзэд боллоо. Харин эмэгтэйчүүдээс “Монгол масс медиа групп” баг тэргүүлж алтан медалийн эзэд болсон бол мөнгөн медалийн эздээр “Ардчилал” сонины баг тодорлоо. Тэгвэл хүрэл медалийн төлөөх тоглолтонд “Шууд” телевизийн баг,  МҮОНТВ-ийн багтай учраа тааран өрсөлдөж “Шууд” телевизийн баг 14:8 харьцаагаар өрсөлдөгчөө буулган авч хүрэл медалиар энгэрээ мялаалаа. Энэ тэмцээнд хэвлэл мэдээллийн салбарт үйл ажиллагаагаа явуулдаг телевиз, сонин, сэтгүүл, сайтын хамт олон, уран бүтээлчид, ажилтан албан хаагчид өрсөлдөж сагсан бөмбөгийн талбайд хурд хүч, ур чадвараа сорьсон юм. Эрэгтэй шилдэг тоглогчоор “Sport Box-1”-н Ж.Идэр-Ууган “Улс төрийн тойм” сонины н.Баатар Эмэгтэй шилдэг тоглогчоор “Шууд” телевизийн О.Мөнгөнчимэг “Монгол масс медиа групп”-ын Т.Хишигбаяр нар шалгарч “Шилдэг тоглогч”-ын цом гардан авлаа. 3 онооны шидэлтийн аваргаар эрэгтэйчүүдээс "Өдрийн шуудан" сонины н.Насанжаргал, эмэгтэйчүүдээс МҮОНТВ-ийн Д.Болорцэцэг нар тодорлоо. А.Алт