“Бүжгэнд уриач”, “Алагхан хорвоод хоёулахнаа” зэрэг нийтийн дуугаар олноо танигдсан дуучин бол Ө.Цэрэнчунт. Тэрбээр 2003 оноос хойш нийтийн дуунд “хүч” үзэж хоёр ч удаа тоглолтоо тавьж, Монгол улсын 16 аймагт аялан тоглолт хийсэн. Өдгөө ОХУ-ын Римский Корсаковийн нэрэмжит сургуульд дуурийн дуулаач мэргэжлээр суралцаж байна. Ө.Цэрэнчунт нь Олон улсын нэг, хоёрдугаар зэрэглэлийн томоохон тэмцээнүүдэд амжилттай оролцож, эх орныхоо нэрийг гаргаад байгаа. Оны өмнөхөн “Алтан гадас” одонгоор энгэрээ мялаасан. Өчигдөрхөн түүний хоолойг “Ард даатгал” компани нэг тэрбумаар даатгасан гээд түүнд сүүлийн үед баярт мөчүүд олон тохиолдож байна. Бид түүнтэй цөөн хором ярилцлаа.

-Таны хоолойг нэг тэрбумаар даатгалаа. Та өөрөө хэзээ мэдсэн бэ?

-Би хоёр хоногийн өмнө л мэдлээ. Эхлээд гайхаж хүлээж авсан. Алдартай нэртэй дуучид бие эрхтэнээ даатгуулдаг гэдгийг бид мэднэ. Миний хоолойг даатгаж байгаад тэр тусмаа нэг тэрбумаар даатгасан баяртай байна. Энэ нь залуу уран бүтээлч миний хувьд бас нэг том итгэл болж байна.

-Эх орондоо хэзээ ирсэн бэ? Хэзээ буцах вэ?

-Би саяхан ирсэн. Ирээд удаагүй байна. Амралтаараа ирсэн. 2-р сарын 15-нд буцна даа.

-Эх орондоо ирэхдээ хоосон ирсэнгүй ээ. Тоглолтоо хийх юм байна. Тоглолтынхоо тухай яриач?

-Харин тийм. “GLASSIC NIGHT  IN ULAANBAATAR” нэртэй тоглолтоо энэ сарын 6-нд ДБЭТ-т тоглох гэж байна. Тоглолтод Беларусийн дуурийн театрын гоцлол дуучин Маргарита Иваново, ОХУ-ын их театрын гоцлол дуучин Илина Золова нар оролцоно. Монголд тоглосон энэ бүрэлдэхүүнээрээ бид ирэх хавар буюу тавдугаар сард Италид тоглолтоо хийнэ. Дуурийн эх орон гэгддэг Италид тоглох гэж байгаадаа их баяртай байна.

-Тоглолтоос олсон орлогоо хүмүүнлэгийн үйлсэд зориулна гэсэн. Юунд зарцуулах юм бэ?

-Тиймээ. СУИС, Хөгжим бүжгийн коллежид тоглолтынхоо орлогыг бүгдийг нь хандивлана. Сургуульд хэрэгтэй байгаа хөгжмийн зэмсэг гэх мэтийг авч өгнө дөө. Тиймээс ирээдүйн урлагийн эзэддээ хөрөнгө оруулалт хийж тоглолтыг маань үзэхийг уншигчиддаа уриалж байна.

-Дуурийн дуулаачид ийм урт буржгар үстэй байх ёстой юу?

-Үгүй ээ./инээв/ Жүжигт тоглоход хиймэл үс зүүхгүй өөрөөрөө амар байдаг юм. Гэхдээ надад зохиж л байгаа биздээ. /инээв/

Сургуулиа хэзээ төгсөх вэ?

Ирэх жил төгсөнө. Г.Хайдав багшийнхаа хүслийг биелүүлэх, өөрийнхөө зорилгыг гүйцээхийн тулд хичээнэ.

Баярлалаа. Өндөр амжилт хүсье.

У.Болор