Энэ онд Монгол Улс Оманы Султант Улстай дипломат харилцаа тогтоосны 20 жилийн ой тохиож байна. Монгол Улсаас Оманы Султант Улсад суух Онц бөгөөд Бүрэн эрхт Элчин сайд К.Сайраан Оманы Султан Кабус Бин Саид Бин Таймур Аль-Бусайди-д Итгэмжлэх жуух бичгээ барьжээ. Итгэмжлэх жуух бичиг барьсны дараа Элчин сайд К.Сайраан, Султан Кабус Бин Саид Бин Таймур Аль-Бусайди нар хоёр орны найрсаг харилцаа, хамтын ажиллагааны талаар санал бодлоо солилцов. Энэ үеэр Элчин сайд К.Сайраан Монгол Улсын Ерөнхийлөгч Ц.Элбэгдоржийн мэндчилгээг Оманы Султанд болон Оманы ард түмэнд уламжилж, Монгол, Оманы харилцаа цаашид өргөжин хөгжинө гэдэгт гүнээ итгэж байгаагаа илэрхийлэв. Султан Кабус Бин Саид Бин Таймур Аль-Бусаиди Монгол Улсын Ерөнхийлөгч Ц.Элбэгдорж болон Монголын ард түмэнд мэндчилгээ дэвшүүлэн, хоёр орны харилцаа, хамтын ажиллагааг өргөжүүлэн хөгжүүлэх үйлсэд өөрийн зүгээс бүх талаар дэмжлэг үзүүлнэ гэдгээ мэдэгдэв.