МҮЭХ-ныхон өнгөрсөн сард -30 гаруй хэмийн хүйтэнд орон даяар цуглаан жагсаал өрнүүлж шатахуунаас үүдэлтэй үнийн өсөлт нь улстөржсөн, үндэслэлгүй байгаа учир үнийн  бууруулахыг шаардаж төрийн чихнээс хонх уясан. Шаардлагаа түшээдийн чихэнд хүргэхийн тулд цуглаанаа орон даяар өрнүүлж Төрийн ордныг хэдэн өдөр бүслэлтэд байлгасан билээ. Үүний хүчинд Нийгмийн зөвшлийн гурван талт хэлэлцээрийг эхлүүлж үнийн өсөлтийг судлах, дүгнэлт гарах, худалдааны хоёр ч хуулийн төслийг УИХ-аар хэлэлцүүлэх, Засгийн газарт хугацаатай үүрэг өгсөн. Тухайн үед зөвшилцөл үр дүнд хүрч Засгийн газрын хүлээсэн үүрэг хоёрдугаар сарын 8-нд дуусгавар болно гэсэн. Өнөөдөр буюу энэ өдөр  гэхэд шатахууны литр тутмын үнэ нэгдүгээр сарын 7-ны өдрийн өмнөх буюу өсөлтөөс өмнөх ханшдаа хүрнэ. Бараа бүтээгдэхүүний ханш дагаад буурч хуучин үнэдээ хүрэх болно гэж МҮЭХ-ны тэргүүн С.Ганбаатар Төрийн ордонд хийлгэсэн хэвлэлийн хурлаараа мэдэгдэж байсан. Хэрэв ингэж чадахгүй бол дараагийн шат дараатай  арга хэмжээ, тэмцэлдээ орно гэсэн билээ. Гэтэл өнөөдрийг хүртэл Засгийн газар үнийг өсөлтийг бууруулах чиглэлээр хийсэн ажил нь бодитоор харагдсангүй. Цагаан сарын уур амьсгалыг дагаад үнийн өсөлт өдрөөс өдөрт нэмэгдэж иргэдийн бухимдал чинээндээ тулчихсан сууж байна. Дөнгөж өчигдөр цалин тэтгэврийг нэмэх төсвийн тодотголыг УИХ-д өргөн барилаа. УИХ-аас байгуулагдсан Валютын ханш, бензин шатахууны үнийн өсөлтийн шалтгааныг судалж, цаашид авах арга хэмжээний талаар санал, дүгнэлт боловсруулах үүрэг бүхий Ажлын хэсгийн санал, дүгнэлт өнөөдрийг хүртэл хүчин төгөлдөр болж хэлэлцэгдээгүй байна. Өнгөрсөн хугацаанд энэ ажлын хэсэг  хэдэнтээ хуралдаж УИХ-ын гишүүд, нефть бүтээгдэхүүнийн импортлогчид, Монголбанк, Шударга өрсөлдөөн эхрэглэгчийн төлөө газар, МХАҮТ, МҮЭХ, Хэрэглэгчдийн эрх ашгийг хамгаалах нийгэмлэгийнхнийг байлцуулан бүтэн өдөржин мэтгэлцэж үнийн өсөлтийн буруутныг хайсан. Шатахуун өргөн хэрэглээний бараа бүтээгдэхүүнийн үнэ гэнэт  нэмэгдэхэд араас нь уурхайлан хөдөлсөн төр өнөөдөр дорвитой зүйл хийгээд ханшийн өсөлтийг хазаарлаж чадаагүй л байна. Хоёрдугаар сарын 8 буюу товлосон өдөр нь болоход өргөн хэрэглээний бараа бүтээгдэхүүнийн ханш жолоо нь татагдахаасаа нэгэнт өнгөрсөн байх юм.