Гамшгийн хэмжээнд хүрсэн агаарын бохирдлыг бууруулах зорилготой үргэлжилж байгаа үр дүнтэй ажлуудын нэг нь нийслэл дэх 250 киловаттаас дээш хүчин чадалтай нам даралтын зуухнуудыг шинэчилж, солих юм. Монголын мянганы сорилтын сангийн “Цэвэр агаар” төсөл гэр хорооллын айлуудын утаатай яндангийн тоог цөөлөхөөс гадна Улаанбаатарт ажиллаж байгаа нам даралтын зуухнуудыг шинэчилнэ. Эхний ээлжинд төвийн бүсийн дөрвөн байрлалд байгаа найман зуухыг солих ажил үргэлжилж байна. Эдгээр зуухнуудыг дулааны улиралдаа багтаад буюу тавдугаар сараас 10-р сарын хооронд хүйтэрхээс өмнө шинэчилнэ. Одоогоор СХД-ын төсвийн байгууллагуудыг буюу сургууль, цэцэрлэг, эмнэлэгийг дулаанаар хангаж байдаг “Талст-Эрчим” усан халаагуурын зуухыг солихоор бэлтгэл ажлаа хангаад байна. “Талст-Эрчим” компанийн захирал Б.Түвшинтөрийн хэлж байгаагаар “Нэг айл нэг өвөлд дунджаар таван тонн нүүрс хэрэглэдэг гэж бодход энэ нам даралтын зуух 400 айлтай тэнцэхүйц хэмжээний нүүрс хэрэглэдэг. Тиймээс хорт утаа маш ихээр ялгаруулдаг. Дээр нь техник, технологийн хувьд хэт хоцрогдсон учир солих шаардлагатай. Гэсэн ч өнөөдрийг хүртэл засвар хийж шинэчлэх боломж байхгүй байсан” гэв . Харин Монголын мянганы сорилтын сангийн “Цэвэр агаар” төслөөс ийм боломжийг бүрдүүлж өгч байгаад баяртай байна гэдгээ хэлсэн юм. Энэхүү ажлыг гүйцэтгэгч компанийг сонгох тендер нээлттэй байгаа. Зуух шинэчилж солих ажлыг хийх компани ямар зуух тавихаа өөрсдөө сонгоно. Харин хувийн хэвшлийн байгууллагынхан зуухаа солих бол тодорхой хэмжээний зардлаа гаргана. “Цэвэр агаар” төслөөс түүнд нь дэмжлэг үзүүлэх юм байна.
Өнөөдрийн байдлаар төвийн зургаан дүүргийн 94 байршилд 180-аад нам даралтын зуух байна. Эдгээр зуухнууд нь захын хорооллын зарим сургууль, цэцэрлэг, цагдаа, хорооны жижиг барилгуудыг халаадаг.
Монголын мянганы сорилтын сангаас хэрэгжүүлж байгаа “Цэвэр агаар” төсөл эхний 8 зуухыг шинэчлэн солих техник, эдийн засгийн дүн шинжилгээг хийж дуусаад байна.
СЭТГЭГДЭЛ БИЧИХ