Эрүүл мэндийн салбарт цахим эрүүл мэндийг дэмжих ажлын хүрээнд өчигдөр www.eruulmendinfo.mn, www.webdoctor.mn цахим сайтуудын нээлт боллоо. www.eruulmendinfo.mn цахим хуудсанд эрүүл мэндийн төрийн болон хувийн хэвшлийн байгууллагууд, эмийн сан, өрхийн, сумын эмнэлэг зэрэг 1200 гаруй байгууллагын мэдээллийг оруулснаараа онцлогтой. Ардын болон гавьяат, өндөр, нарийн мэргэжлийн эмчийн холбогдолтой хувь хүмүүсийн мэдээллүүдээс гадна спорт цогцолбор, фитнес төв, төрөлжсөн лавлах утас, эрүүл мэндийн ТББ, биеийн тамирын ТББ, рашаан сувилалын газрууд, олон улсын байгууллагуудын лавлагааны 800 орчим мэдээллийг оруулсан аж. Мөн ард иргэд, эмч нарт зориулсан эрүүл мэндийн зөвлөгөө, мэдээллийн www.webdoctor.mn сайтын цахим хуудсанд эрүүл мэнд, анагаах ухааны мэдээ, эмчийн зөвлөгөө, номын сан, хичээл, видео, хэлэлцүүлэг, өвчин, эмчийн булангуудаас өөрт хэрэгтэй баталгаатай эрүүл мэнд, анагаах ухааны мэдээллийг түргэн шуурхай авах боломжтой гэнэ. “Вэб доктор”- цахим хуудас нь олон нийтэд мэдээлэл өгөхөөс гадна эмч нарыг гишүүнээр элсүүлэн бүртгэх, гишүүд эмч нар хоорондоо мэдээлэл солилцох, мэргэжлийн чиглэлээр өөрт байгаа ном, сэтгүүл, өвчин эмгэгтэй холбоотой мэдээллийг оруулан бусад эмч нартай хуваалцах, ном сэтгүүл татаж авах, зайн сургалтын материал, илтгэл, видео хичээлүүдийг оруулах, үзэх боломжийг хангаснаас гадна эмч нар өөрсдийн оруулсан мэдээллээ баталгаажуулах, кредитжүүлэх боломж бүрдсэн. Цахим эмч хуудсанд ЭМШУИС-тай хамтран ДЭМБ-ын эрүүл мэндийн нэгдсэн мэдээллийн сан болох HINARI –д холбогдон вэбийн хэрэглэгч эмч нар цахим номын сангаас мэдээлэл үнэгүй ашиглах боломжийг бүрдүүлсэн аж.