Эгч дүүсийг зэрэмдэглэсэн хэрэгт шүүгдэж гэм буруутай нь тогтоогдсон ч өршөөгдөж суллагдсан П.Сумьяажав дахин  танхайн хэрэгт татагдан Баянгол дүүргийн цагдаагийн хэлтэст шалгуулж байгаа юм. Түүнийг танхайн хэргээр шалгах явцад удаа дараагийн үйлдлээр бүлэглэн Ломбард тоносон хэрэг ч илэрч, улмаар хоёр зүйл ангиар ял сонсох болсон юм. Уг хэргийг Баянгол дүүргийн цагдаагийн хэлтэст шалгах ажил үргэлжилж буй бөгөөд 6-7 хүн хамсаатнаар татагдсан байна. Эх сурвалжийн мэдээллээр Баянгол дүүргийн прокурорын газраас П.Сумьяажавын гэрт нэгжлэг хийхэд ломбардаас алдагдсан эд зүйлс гарч ирсэн байна. Одоогоор түүнийг хулгай, танхайн хэрэгт сэжигтнээр татаж шалгаж байна. П.Сумьяажавын өмнө нь үйлдсэн хэргийг нэхэн сануулбал тэрбээр шунахай сэдэлтээр 2009 оны хоёрдугаар сарын 14-ний өдөр найз Д.Бямбадоржтойгоо урьдчилан үгсэн тохиролцож, Баянгол дүүргийн 19 дүгээр хороонд оршин суух иргэн О-гийн гэрээс эд зүйл дээрэмдэх гэмт хэргийг зохион байгуулж, 11 сая 400 мянган төгрөг, 100.000 төгрөгийн үнэтэй “Коника” маркийн гэрэл зургийн аппарат зэргийг дээрэмдэх явцдаа 5 настай Н-ийн хоолойг хэрчиж хөнөөхөд Д.Бямбадоржийг өдөөн түлхэж, биеэ хамгаалж чадахгүй байгааг мэдсээр байж, онц харгис хэрцгий аргаар хоолойг нь хэрчиж амь насыг нь бүрэлгэсэн гэмт хэргийг үйлдэж шүүхээс ял сонссон юм. Тэрбээр мөн 12 настай О-г биеэ хамгаалж чадахгүй байгааг мэдсээр байж, онц харгис хэрцгий аргаар хоолойг нь хэрчсэн үйлдлээ ч шүүхийн өмнө хүлээсэн юм. Түүнийг давж заалдах шатны шүүхээс насанд хүрээгүй байхдаа гэмт хэрэг үйлдсэн гэсэн үндэслэлээр 2009 онд батлагдсан өршөөл үзүүлэх тухай хуульд хамруулж суллагдаж байжээ. Н.Бүжин