Монгол Улсын Засгийн газраас “Хүний хөгжил сан”-гаар дамжуулан ахмадууд болон хөгжлийн бэрхшээлтэй иргэдэд нэг сая төгрөгийг бэлнээр олгохоор шийдвэрлэсэн. Нэг сая төгрөгийг хэзээнээс олгож эхлэх талаар Монгол Улсын сайд, Засгийн газрын Хэрэг эрхлэх газрын дарга Ч.Хүрэлбаатараас тодрууллаа. -Ахмад настан болон хөгжлийн бэрхшээлтэй иргэд нэг сая төгрөгөө авна гэсэн хүлээлт нийгэмд их байна. Эдгээр иргэд хэзээ сая төгрөгөө авах вэ? Энэ асуудалтай холбоотой УИХ-ын дөрвөн шийдвэр гарсан. УИХ-ын 39, 53, 57-р тогтоолоос гадна 2012 оны улсын төсөв гэсэн  дөрвөн бичиг баримтаар энэ асуудал зохицуулагдана. УИХ-ын 53-р тогтоолд нэг сая төгрөгийг ахмадууд болон хөгжлийн бэрхшээлтэй иргэдэд олгох тухай заасан. Харин 57-р тогтоолоор иргэд сая төгрөг, хувьцаа хоёрын аль нэгийг сонгох боломжийг олгосон. Тэгэхээр яах аргагүй 39-р тогтоолд өөрчлөлт оруулж Тавантолгойн хувьцааны 10 хувийг нэмж иргэдэд олгох шаардлага үүсээд байгаа юм. Тэгэхээр УИХ дээрх гурван тогтоолын зөрчлийг арилгаж байж  энэ асуудлыг шийдвэрлэх боломжтой гэсэн үг. Ирэх долоо хоногт УИХ чуулганы хугацааг сунгахаар болсон. Тиймээс  хуралдан шийдвэр гаргана гэж найдаж байна. Ингэсэн тохиолдолд Засгийн газар хэрэгжүүлэхэд бэлэн байна. Хүлээгдэж байгаа шалтгаан нь энэ. -Энэ асуудлыг ирэх долоо хоногт УИХ шийдчихвэл сар шинийн баяраас өмнө ахмадууд болон хөгжлийн бэрхшээлтэй иргэд сая төгрөгөө авах боломж бий юу. -УИХ-ын шийдвэр гарсан тохиолдолд “Хүний хөгжил сан”-гаас хишиг, хувь олгох журамд өөрчлөлт оруулж, мөнгө олгох бүрэн боломжтой. Д.Цэцэг