УИХ-ын нэгдсэн чуулганаар УИХ-ын гишүүн Я.Батсуурь, Д.Одбаяр нарын өргөн мэдүүлсэн  Тавантолгойн нүүрсний ордыг ашиглах замаар зарим асуудлын тухай УИХ-ын 39-р тогтоолд нэмэлт, өөрчлөлт оруулах тухай тогтоолын төслийг хэлэлцлээ. Уг тогтоолын төсөлд Тавантолгойн ордын нийт хувьцааны 20 хувийг иргэдэд олгох саналыг тусгаад байгаа билээ. Дээрх тогтоолын төслийг хуралд оролцогч гишүүдийн олонхийн дэмжлэгийг авсан юм. Ингэснээр иргэн бүрийн Хүний хөгжил сангийн дэвтэрт нэг сая хүртэл төгрөгийн хувьцаа гэсэн бичилтийг хийхээр болж байгаа юм.  Харин сургалтын төлбөр хэлбэрээр хоёр удаа тус бүр 500 мянган төгрөгөөр нийт нэг сая төгрөг авсан оюутнууд, сая төгрөгөө бэлнээр авах өндөр настан, хөгжлийн бэрхшээлтэй иргэдийн дэвтэрт хасалт хийсэн бичилт дахин хийхээр болж байгаа юм байна. Ингэснээр тэдгээр иргэдэд Тавантолгойн хувьцаанаас хүртэх боломж хаагдаж мэдэхээр болоод байгаа аж. Бусад иргэд хувьцаагаа бэлэн мөнгө болгоно гэвэл “Эрдэнэс Тавантолгой” компанийн хувьцааг арилжаалж IPO хийхээс өмнө Засгийн газарт худалдаж болох юм. Засгийн газар  иргэдээс хувьцааг нэрлэсэн үнээр нь худалдаж аваад үндэсний аж ахуйн нэгжүүдэд мөн нэрлэсэн үнээр нь санал болгон худалдахаар төсөлд тусгаад байгаа юм. Үүний дараа Тавантолгойн тогтоолыг эцсийн хэлэлцүүлэгт шилжүүлэхээр болж үдээс хойш Эдийн засгийн байнгын хороогорор хэлэлцэхээр боллоо. Мөн хуралдаанаар УИХ-ын гишүүн З.Энхболд, Д.Лүндээжанцан нарын өргөн барьсан Орон нутгийн сонгуулийн хуулийг хэлэлцэж, үдээс хойш 15.00 цагаас Төрийн байгуулалтын байнгын хорооны хурлаар хэлэлцэхээр болсон юм. С.Заяа