Сүүлийн өдрүүдэд нийслэлийн ерөнхий боловсролын сургуулийн сурагчдын дунд гахайн хавдар өвчний тархалт их байгаа. Үүнээс болж  Сүхбаатар дүүргийн I сургуулийн нэг бүлгийг хичээлийг түр зогсоож, хөл хорио тогтоогоод байсан тухай бид өмнө нь мэдээлж байсан. Харин түүнээс хойш энэ сургуулийн дөрвөн ангийн хичээлийг сар шинэ дуустал зогсоох шийдвэр гарчээ. Тус сургуулийн нэг, гуравдугаар ангийн тус бүр нэг бүлэг, есдүгээр ангийн хоёр бүлгийн хичээлийг түр зогсоосон аж.Учир нь гахай хавдар туссан хүүхдийн тоо тус сургуульд 6-8 болсон байна. Эрүүл мэндийн сайдын 214 тоот тушаалд тухайн байгууллагад халдварт өвчин туссан хүний тоо дөрвөөс их байвал хөл хорио тогтоох ёстой гэж заасан байдаг. Тиймээс I сургуулийнхан дүүргийнхээ мэргэжлийн хяналтын байцаагчид хэлж, халдвар хамгийн их тархсан дөрвөн ангийн хичээлийг түр зогсоосон юм. Дашрамд дурдахад, өнгөрсөн долоо хоногт 110 хүүхэд халдвар авч, өнөөдрийн байдлаар 40 орчим  хүүхэд ХӨСҮТ-д эмчлүүлж байгаа аж. Д,Цэцэг