УИХ-ын Байгаль, орчин хөдөө аж ахуйн байнгын хорооны хуралдаанаар Газрын тухай багц хуулийн төслийг хэлэлцэж байна. Энэ үеэр ЗТБХБ-ын сайд Х.Баттулга, УИХ-ын гишүүн Л.Гүндалай, П.Алтангэрэл нарын дунд багагүй маргаан дэгдлээ. Хуулийн төслийн танилцуулгын дагуу гишүүд салбарын сайд болон бусад албаны хүмүүсээс асуулт асууж байтал УИХ-ын гишүүн Л.Гүндалай “Газар гэдэг ямар үнэ цэнэтэй зүйл болохыг хүн бүр мэднэ. Гэтэл өнөөдөр жирийн иргэдэд газар олдохоо болилоо” гэх мэтчилэнгээр асуудлыг нэлээд сунжируулж гарав. Түүний яриаг таслахаар байнгын хорооны дарга П.Алтангэрэл “Асуултаа богино хугацаанд тодорхой асуугаарай” хэмээн сануулга өгөхөд, Л.Гүндалай “Би асуулт асууж байна. Асуулт, санал хоёрыг ялгаж сур. Бид энэ хуулийн төслийг маш сайн боловсруулаад баяр ёслолын байдалтай батлах ёстой. Бид ямар ямаанд 30 тэрбум батлаж өгч байгаа биш. Энэ асуудалд нухацтай хандах ёстой. Ийм асуудал хэлэлцэж байхад энд нэг ширхэг сайд л сууж байна. Уг нь энд БОАЖ, ЭБЭХ, Засгийн газрын сайд Ч.Хүрэлбаатар, Засаг дарга гээд олон хүн байх ёстой байсан”  гэх мэтчилэнгээр дахин яриж гарсан юм. Хэсэг хугацааны дараа байнгын хорооны дарга түүнд дахин сануулга өгөв. П.Алтангэрэл: Дэгийн хуулиараа дөрвөн минут л нэг гишүүн ярих ёстой шүү. Л.Гүндалай: Битгий солиор. Би  дахиад найман минут ярина. Битгий дэмий юм яриад байгаарай. Дуугаа хурлаа удирд. Юу ч чадахгүй юм байж. П.Алтангэрэл: Чи өөрөө юу чаддаг юм бэ? Л.Гүндалай: Би чадахгүй л дээ. Гэхдээ чамайг бодвол юм мэддэг хүн ярьж байна. Аятайхан байгаарай.  Өө янз бүрийн юм ярьж саатуулаад хүний ярих гэж байсан хамаг юм мартуулчихлаа. П.Алтангэрэл: Асуулт гэж илтгэл шиг юм яриад байгаагаа мэдэж байна уу. Х.Баттулга: Сонгууль дөхөөд зарим хүмүүс улстөр хийгээд байх шиг байна. Л.Гүндалай чи хуулийн төслөө уншчихаад дараа нь ярь. Чи энэ хуулийн шинэчилсэн найруулгын төслөөс нэг хуудас ч уншаагүй байна. Л.Гүндалай: Уншсан. Х.Баттулга: Уншаагүй байна. Хоёр намын бүлэг дээр ярьж байхад чи байгаагүй юм чинь яаж ойлгох юм бэ. Л.Гүндалай: Би хуралд суусан. Чи намайг уншаагүйг яаж мэдэж байгаа юм бэ. Чи хурлын ирц бүртгэдэг юм уу. Х.Баттулга аа, сайд болсноо чи юу гэж бодоод байгаа юм бэ. Миний уншсан эсэх талаар ярих гээд байгаа бол миний өрөөнд ороод ир. Гэх мэтчилэнгээр Л.Гүндалай гишүүн нэлээд уурласан байдалтай байсан ч Байнгын хорооны хурал цааш үргэлжилж холбогдох мэргэжилтнүүд гишүүдийн асуултад хариулт өглөө. Л.Гүндалай гишүүн Х.Баттулга сайдын хэлсэн үгэнд нэлээд уурласан байдалтай сайдын суудал руу дөхөж очоод “Чи миний уншаагүйг яаж мэдэж байгаа юм бэ” хэмээн асуудлаа эхнээс тавьж байгаа харагдав. Байнгын хорооны хуралдаан үргэлжилж байна. Газрын тухай багц хуулийг байнгын хорооны хурлаас хэлэлцэх эсэхийг шийдсэний дараа 2011 оны Төсвийн тухай хуулд нэмэлт, өөрчлөлт оруулах эсэх асуудлыг уг байнгын хорооны хуралдаанаар хэлэлцэхээр төлөвлөөд байгаа билээ.