Өмнөд Солонгосын тал өчигдрөөс эхлэн зарласан цэргийн хээрийн сургуулилтаа эхлүүллээ. Хоёр Солонгосын хооронд 2010 онд мөргөлдөөн гарсан Ёнпёнгдо арлын ойролцоо хийх уг цэргийн сургуулилтыг Умардын талд Сөүлээс албан ёсоор мэдэгдсэн бөгөөд өнөөдөр тогтсон цагтаа эхэлжээ. Хэдийгээр БНАСАУ энэхүү цэргийн сургуулилтыг өдөөн хатгалга гэж үзнэ хэмээн анхааруулсан ч Сөүл төлөвлөгөөгөө өөрчилсөнгүй. Танк, артиллерын зэвсэглэлүүд, байлдааны хөлөг онгоц, шумбагч онгоц, нисэх онгоцууд зэрэг байлдааны хүнд техникүүд ашиглан уг сургуулилтыг хийж байгаа аж. Сургуулилт дуусах хүртэлх хугацаанд ойролцоох арлын оршин суугчдыг аюулгүй газарт хоргодуулж байгаа гэнэ. Одоогоор хатуу анхааруулга өгсөн Умардын тал ямар нэгэн мэдэгдэл, алхам хийгээгүй байна. Энэхүү Өмнөд Солонгосын цэргийн хээрийн сургуулилт нь агаар, газар, далайд зэрэг хийгдэж байгаа бөгөөд Умардын шинэ удирдагчийн цаг үед хийгдэж байгаа анхны томоохон сургуулилт гэдгээрээ онцлог ажээ. Хоёр улсын харилцааг хүйтрүүлдэг цэргийн сургуулилтууд ийнхүү байнга шахуу дуулиан дагуулж байдаг. Үүний нэг нь өнөөдрийн Өмнөдийн цэргийн сургуулилт болж байна. О.Нар